ორმოცდაათი წლის წინ, 1968 წლის 13 მაისს, თეირანში, ადამიანის უფლებების შესახებ გაეროს საერთაშორისო კონფერენციაზე მთელი მსოფლიო შეთანხმდა, რომ "მშობლებს გააჩნიათ ადამიანის ფუნდამენტური უფლება თავისუფლად და პასუხისმგებლობით განსაზღვრონ, რამდენი შვილი იყოლიონ და როდის".

ოჯახის დაგეგმვა არამხოლოდ ადამიანის უფლებების საკითხია, არამედ გადამწყვეტია ქალის კეთილდღეობისა და დამოუკიდებლობის მისაღწევად.

რა თქმა უნდა, ორსულობისთვის წინასწარ მომზადებას ბევრი უპირატესობა აქვს. ამ სტატიაში მხოლოდ 7 მათგანს შემოგთავაზებთ.

1. ოჯახის დაგეგმვა ქალს საშუალებას აძლევს, უკეთ მოემზადოს ორსულობისათვის

მაგალითად: შეცვალოს ცხოვრების სტილი, უარი თქვას სიგარეტზე, წინასწარ მიიღოს ვიტამინები და ასე შემდეგ.

2. დაგეგმილი ორსულობის შემთხვევაში ბევრად ადვილია კარიერისა და ოჯახის შეთავსება

არაფერია იმაზე თავზარდამცემი, ვიდრე ორსულობის აღმოჩენა მაშინ, როცა საოცნებო სამსახურში ერთი თვის წინ დაიწყე მუშაობა.

3. ოჯახის დაგეგმვით შესაძლებელია ორსულობებს შორის ოპტიმალური ინტერვალის დაცვა

როცა ერთი ბავშვი ძალიან პატარაა, დამატებითი "მოთამაშის" შემოყვანას ყველაფრის თავდაყირა დაყენება შეუძლია. გარდა ამისა, გაიხსენეთ შემთხვევები, როცა ექიმი თავად ურჩევს ქალს, დროებით ორსულობისგან თავი შეიკავოს.

4. ოჯახის დაგეგმვა აბორტების რიცხვს ამცირებს

ოჯახის დაგეგმვა ხელს უშლის ხშირ / არასასურველ ორსულობას და შესაბამისად, ისეთ სახიფათო პროცედურებსაც ამცირებს, როგორიც აბორტია.

5. ოჯახის დაგეგმვა წყვილს საშუალებას აძლევს, უკეთ განკარგოს ფინანსები და შესაბამისად, შვილებისთვის უკეთესი ბავშვობა უზრუნველყოს

მაშინ, როცა ქალი და კაცი თანხმდებიან, რამდენი შვილის ყოლა სურთ და როდის - ბევრად მეტია შანსი, რომ ბავშვები უკეთეს პირობებში გაიზარდონ.

6. ოჯახის დაგეგმვა ამცირებს დედათა და ჩვილთა სიკვდილიანობას

ორსულობებს შორის სათანადო შუალედის დაცვა დედას და ბავშვს ჯანმრთელობის პრობლემებისგან იცავს.

7. ოჯახის დაგეგმვა პარტნიორებს შორის ჰარმონიულ ურთიერთობას უზრუნველყოფს

როცა წყვილი მომზადებული ხვდება მნიშვნელოვან ცვლილებებს, ეს მინიმუმამდე ამცირებს მათ შორის კონფლიქტის შანსს.

ნახეთ ვიდეო, რომელიც ოჯახის დაგეგმვასთან დაკავშირებით გაეროს მოსახლეობის ფონდმა მოამზადა.