ლივერპულმა მომდევნო სეზონში ჩემპიონთა ლიგაზე თამაში გაინაღდა, მოჰამედ სალაჰმა პრემიერლიგის რეკორდი დაამყარა, კლოპმა კი სალაჰს კიდევ ბევრად მეტი შეუძლიაო.

პრემიერლიგის უკანასკნელ ტურში მერსესაიდელებმა შინ ბრაიტონი მიიღეს და ოთხბურთიანი სხვაობით დაამარცხეს. პირველი გოლი "წითლებიდან" სწორედ მოჰამედ სალაჰმა გაიტანა და ეს მისთვის ინგლისის ჩემპიონატის მიმდინარე სეზონში გატანილი 32-ე გოლი აღმოჩნდა.

აქამდე საუკეთესო შედეგი ერთ სეზონში გატანილი 31 გოლის სახით ალან შირერს (1995-96), კრიშტიანუ რონალდუსა (2007-08) და ლუის სუარესს (2013-14) ეკუთვნოდათ.

"სალაჰის რეკორდის შესახებ არაფერი ვიცოდი. იგი მოედნიდან გავიყვანე და შემდეგ გავიგე, რომ ტოტენჰემს 5 ბურთი ჰქონდა გატანილი. მას (სალაჰს) კიდევ შეუძლია პროგრესირება. იგი მომავალშიც გაიტანს, 100%", - განაცხადა ლივერპულის მთავარმა მწვრთნელმა იურგენ კლოპმა.