სომხეთის დედაქალაქში, ერებუნის რაიონში, შეიარაღებული დაჯგუფება სატვირთო მანქანებით პოლიციის ტერიტორიაზე შეიჭრა და შენობის აღება სცადა, რის შედეგადაც ერთი პირია გარდაცვლილი. ინფორმაციას EKhokavkaza Yerkirmedi-ზე დაყრდნობით ავრცელებს.

დღეს დილას შეიარაღებულმა დაჯგუფებამ ხელში ჩაიგდო პოლიციისა და შინაგანი ჯარების შენობა. ამბოხებულების მთავარ მოთხოვნას სომხეთის ოპოზიციური სამოქალაქო ინიციატივის - დამფუძნებელი პარლამენტის კოორდინატორის, ჟირაირა სეფილიანის გათავისუფლებაა, რომელიც იარაღის უკანონო შეძენა-შენახვისათვის არის ბრალდებული.

გამოძიების ინფორმაციით, სეფელიანი შეიარაღებულ დაჯგუფებასთან ერთად აპირებდა შენობების, ტელეკომუნიკაციების, მათ შორის ერევნის სატელევიზიო ანძის დაკავებას.

მათივე ცნობით, დანაშაულებრივი ჯგუფი გეგმავდა ყარაბაღის კონფლიქტის ზონაში ვითარების ესკალაციას პროვოკაციების გზით.

ადგილობრივი მედიის ცნობით, ერევნის პოლიციის უფროსის მოადგილე, ვალერი ოსიპიანი ტყვედ არის აყვანილი. ამ დროისთვის, შენობასთან მობილიზებულია სამხედრო დანაყოფები, ადგილზევეა მისული ერევნის პოლიციის უფროსი, ვლადიმირ გასპარიანი.

News.am-ის ინფორმაციით კი, სომხეთის ეროვნული უშიშროების სამსახური იუწყება, რომ სოციალური ქსელებით გავრცელდა ინფორმაცია აჯანყების დაწყებისა და ზემოაღნიშნული შენობის აღების შესახებ. თუმცა, უწყება განმარტავს, რომ აღნიშნული სიმართლეს არ შეესაბამება და სახელმწიფო მართვის ორგანოები ჩვეულ რეჟიმში მუშაობენ.

რაც შეეხება შეიარაღებულ პირებს, ამ ეტაპზე მათთან მოლაპარაკება მიმდინარეობს იმისთვის, რომ მშვიდობიანად ჩაბარდნენ სამართალდამცავ ორგანოებს:

"ნებისმიერ უკანონო ქმედება იქნება შეჩერებული, დამნაშავეებს კი პასუხისგებაში მისცემენ".