Chris Rea-ს 2 727 ყალბი ბილეთის გაყიდვის ბრალდებით, ფინანსთა სამინისტროს საგამოძიებო სამსახურმა ერთი პირი დააკავა. ამის შესახებ ინფორმაცია ფინანსურმა პოლიციამ რამდენიმე წუთის წინ გაავრცელა.

უწყების ინფორმაციით, ბრალდებულმა თანამზრახველთან ერთად შეიმუშავა გეგმა, რომლის მიხედვითაც მომღერლის კონცერტი 2017 წლის 30 დეკემბერს უნდა გამართულიყო. გაყიდული ყალბი ბილეთების ჯამური ღირებულება 152 850 ლარი იყო.

"თითქოსდა მისი კომპანიის ორგანიზებით, ქალაქ თბილისში, მსოფლიო ტურნეს ფარგლებში, კონცერტს გამართავდა ცნობილი მუსიკოსი კრის რი. დანაშაულებრივი გეგმის განხორციელებისას, ბრალდებულმა, ფორმალურად გააფორმა ხელშეკრულებები ერთ-ერთ საკონცერტო დარბაზთან და ბილეთებით ონლაინ მოვაჭრე კომპანიასთან", - აცხადებენ უწყებაში.

საქმეზე გრძელდება გამოძიება საქართველოს სისხლის სამართლის კოდექსის 180-ე მუხლის მე-3 და მე-4 ნაწილებით, რაც სასჯელის სახით ითვალისწინებს თავისუფლების აღკვეთას 7-დან 10 წლამდე ვადით.

"ამ ეტაპზე, ტარდება შესაბამისი ღონისძიებები დანაშაულში მონაწილე სხვა პირების გამოვლენა - მხილების მიზნით", - აღნიშნავენ ფინანსურ პოლიციაში.