ევროპული საქართველოში მიაჩნიათ, რომ ტელეკომპანია რუსთავი 2-ის გენერალური დირექტორი, ნიკა გვარამია საქართველოს ხელისუფლების მიერ ევროსასამართლოში გაგზავნილ მოსაზრებას მათ წინააღმდეგ იყენებს. ამის შესახებ პარტიამ განცხადება მას შემდეგ გაავრცელა, რაც გვარამიამ ევროპული საქართველოს მიერ გავრცელებული განცხადების, არხის წინააღმდეგ, მტკიცებულებებად დართვაზე ისაუბრა.

"მისივე ლოგიკით თუ ვიმსჯელებთ, ხელისუფლებამ გვარამიას განცხადებებიც მოიხმო თავისი პოზიციის გასამყარებლად, შესაბამისად, გამოდის, რომ გვარამია უწყობს ხელს მთავრობას რუსთავი 2-ის წინააღმდეგ დავაში, რაც, რა თქმა უნდა, აბსურდია", - ვკითხულობთ პარტიის განცხადებაში.

ამავე განცხადებით, გენერალური დირექტორის განცხადებები და პროდასავლურ ოპოზიციასთან ბრძოლა უადგილოა, რაც რუსთავი 2-ს აზიანებს და ხელისუფლების ინტერესებია.

"მოსამართლე ურთმელიძის არგუმენტებს იშველიებს, რომ ხელისუფლებას სინამდვილეში პრობლემა აქვს რუსთავი 2-ის სარედაქციო პოლიტიკასთან და სწორედ ამით ცდილობენ მესაკუთრის ცვლილების გამართლებას", - აღნიშნავენ პარტიაში.

ტელეკომპანია რუსთავი 2-ის იურისტის, თამთა მურადაშვილის თქმით, საქართველომ ევროსასამართლოს აცნობა, რომ არხის წილებთან დაკავშირებით პოლიტიკურად მოტივირებული დავა არ არსებობდა და პირიქით, რუსთავი 2 ესხმოდა სასამართლოს თავს.

მურადაშვილი ამბობს, რომ არხის მიკერძოებულობის მაგალითებად საქართველოს ხელისუფლებამ ევროპული საქართველოსა და არხის ყოფილი ჟურნალისტის, აკაკი გოგიჩაიშვილის განცხადებები მოიყვანეს.

ამ საკითხზე On.ge საქართველოს იუსტიციის სამინისტროსაც დაუკავშირდა. უწყების პრესსამსახურში აღნიშნეს, რომ ამ საკითხზე არავის სურს საუბარი.

რუსთავი 2-ის საქმე

2017 წლის 3 მარტს სტრასბურგის ადამიანის უფლებათა ევროპულმა სასამართლომ რუსთავი 2-ის საქმეზე უზენაესი სასამართლოს მეირ გამოტანილი გადაწყვეტილების აღსრულება შეაჩერა. წინა დღეს, 2 მარტს საქართველოს უზენაესი სასამართლოს დიდმა პალატამ რუსთავი 2-ის 100 პროცენტი ქიბარ ხალვაშს მიაკუთვნა.

დეკემბერში სასამართლომ რუსთავი 2-ისა და მისი მფლობელების საქმის დასაშვებობაზე მსჯელობა დაიწყო. სტრასბურგის სასამართლო თითოეულ მომჩივანთან დაკავშირებით საქართველოს მთავრობას კითხვებს უსვამდა.

იუსტიციის სამინისტროს ცნობით, საქმეზე საკუთარი პოზიცია საქართველოს მთავრობამ სტრასბურგის სასამართლოს 28 მარტს წარუდგინა.

გაიგეთ მეტი რუსთავი 2-ის საქმეზე.