ევროპული საქართველოს წევრი ირმა ნადირაშვილი არაადეკვატურს უწოდებს პრეზიდენტის ადმინისტრაციის უფროსის, გიორგი აბაშიშვილის განცხადებას, რომელმაც ევროპული საქართველო და უმრავლესობა პრეზიდენტის წინააღმდეგ გაერთიანებაში დაადანაშაულა.

ირმა ნადირაშვილის თქმით, პრეზიდენტის ადმინისტრაციამ პასუხისმგებლობის თავიდან აცილება არ უნდა სცადოს და კრიტიკა მიიღოს :

"არაადეკვატური და ისტერიული ტონით პასუხი კრიტიკაზე არის ქართული ოცნების სტილი, რისგანაც ჩვენ ყოველთვის ვიცავდით და მხარში ვედექით პრეზიდენტს. სამწუხაროა, რომ დღეს პრეზიდენტმა და მისმა ადმინისტრაციამ ზუსტად ასეთივე არაადეკვატური და ისტერიული ტონი გამოიყენეს, როდესაც ჩვენ მას სამართლიანად ვაკრიტიკებდით.

ფაქტია, რომ პრეზიდენტის მიერ შეწყალებულმა ადამიანმა უმძიმესი დანაშაული ჩაიდინა, 25 წლის ადამიანი სიცოცხლეს გამოასალმა. პასუხისმგებლობისგან გამოძრომა, როდესაც ადამიანი უკვე დაიღუპა, როდესაც წინა შემთხვევები ვიცით, მისმა გათავისუფლებულმა ნათესავებმა ხელახლა როგორ ჩაიდინეს დანაშაული, ამ შემთხვევაში არ არის ლამაზი"