საქართველოში სანთებელების კონტოლი ამოქმედდა. ამის შესახებ ინფორმაცია საქართველოს სტრატეგიული კვლევებისა და განვითარების ცენტრმა გაავრცელა. ევროკავშირთან ასოცირების შეთანხმების ფარგლებში, საქართველომ აიღო ვალდებულება სანთებელების კონტროლი დაეწესებინა.

ცენტრის განმარტებით, დასაშვები გახდა მხოლოდ ისეთი სანთებლების გაყიდვა რომელიც დაპროექტებული და აწყობილია იმგვარად, რომ ჩვეულებრივი მოხმარების პირობებში შეუძლებელია მისი გამოყენება 51 თვეზე მცირე ასაკის (4,3 წელი) ბავშვის მიერ. ამ ვალდებულების შესრულებაზე კონტროლი კი დაევალა ტექნიკური და სამშენებლო ზედამხედველობის სააგენტოს. მან ბაზრიდან უნდა ამოიღოს ისეთი სანთებელები, რომლებიც ზემოაღნიშნულ მოთხოვნას არ აკმაყოფილებენ.

ცენტრის თქმით, მსოფლიო გამოცდილებით, ხანძრების გაჩენის ერთ-ერთი გავრცელებული მიზეზი ბავშვების მიერ სანთებელების გამოყენებაა:

"ამ პრობლემას აშშ-სა და ევროკავშირში ჯერ კიდევ 90-იან წლებში მიაქციეს ყურადღება. ოფიციალური მონაცემებით, აშშ-ში ბავშვების მიერ სანთებელების გამოყენების შედეგად ყოველწლიურად, დაახლოებით, 5 000 ხანძარი ჩნდებოდა, რასაც, დაახლოებით, 1 150 ადამიანის დაზიანება და 170 ადამიანის სიკვდილი მოჰყვებოდ".

მათი თქმით, ამ საფრთხის შესამცირებლად აშშ-ში აკრძალეს ისეთი სანთებელების გაყიდვა, რომელთა ანთებაც მცირეწლოვან ბავშვებს შეეძლოთ. ამან ხანძრებისა და მათგან გამოწვეული ზიანის 60 პროცენტით შემცირება გამოიწვია. მოგვიანებით ასეთივე აკრძალვა დაწესდა ევროკავშირის ქვეყნებში.