ეროვნული ბანკის მონაცემებით, 2018 წლის თებერვალში საქართველოში 113,9 მილიონი აშშ დოლარის ოდენობის ფულადი გზავნილი შემოვიდა, რაც 280,6 მილიონი ლარია. ეროვნული ბანკის ცნობით, ეს მონაცემი 21 პროცენტით (19,8 მლნ აშშ დოლარით) მეტია 2017 წლის თებერვლის ანალოგიურ მაჩვენებელზე.

ევროკავშირის ქვეყნებიდან ყველაზე მეტი გზავნილი იტალიიდან და საბერძნეთიდან განხორციელდა. არაევროპულ ქვეყნებში კი, გზავნილების მხრივ, რუსეთი და ისრაელი ლიდერობენ.

ფოტო: ეროვნული ბანკი

უცხოეთიდან საქართველოში ფულადი გზავნილების 90,5 პროცენტი იმ 12 უმსხვილეს დონორ ქვეყანაზე მოდის, საიდანაც ასეთი გზავნილების მოცულობამ თებერვალში 1 მილიონ აშშ დოლარს გადააჭარბა. იმავე 12 ქვეყანაზე გასული წლის თებერვალში მთელი ფულადი გზავნილების 91 პროცენტი მოდიოდა.

2018 წლის თებერვალში საქართველოდან საზღვარგარეთ 18 მილიონი აშშ დოლარი (44.3 მლნ ლარი) გადაიგზავნა, ნაცვლად 14,6 მლნ აშშ დოლარისა (38,5 მილიონი ლარისა) გასული წლის თებერვალში.