დე ფაქტო სამხრეთ ოსეთის პრეზიდენტმა, ანატოლი ბიბილოვმა ჟენევის დისკუსიების თანათავმჯდომარეებთან შეხვედრაზე განაცხადა, რომ ტატუნაშვილის ცხედრის არ გადაცემაზე არავინ საუბრობს, თუმცა საზოგადოებაში ეს აზრიც არსებობს. ინფორმაციას დე ფაქტო ხელისუფლების მედია ავრცელებს.

"კარგად გვესმის, რომ ცხედრის გადაცემისთვის სასამართლო-სამედიცინო ექსპერტიზა არის ჩასატარებელი. ეს მიღებულია ევროპაშიც და ამერიკაშიც. მაგალითად, საქართველოში სასამართლო-სამედიცინო ექსპერტიზისთვი მინიმუმ ერთი თვეა საჭირო", - განაცხადა ბიბილოვმა.

მისივე თქმით, ცხინვალის რეგიონში კონფლიქტის დროს უგზო-უკვლოდ დაიკარგა 150 მებრძოლი, რომელთა შესახებ მათ არაფერი იციან, მაგრამ ამისგან "პოლიტიკას არ აკეთებენ".

ტატუნაშვილის საქმე

22 თებერვალს ცხინვალის ციხეში საქართველოს მოქალაქე გარდაიცვალა. ოსური მხარის ვერსიით, არჩილ ტატუნაშვილმა იზოლატორში გადაყვანისას პოლიციელისთვის იარაღის წართმევა სცადა, საპასუხო ძალის გამოყენების შედეგად შეუძლოდ გახდა, კიბეებზე წაიქცა და მოგვიანებით საავადმყოფოში დაიღუპა.

სახელმწიფო უსაფრთხოების სამსახურის ინფორმაციით, ოსური მხარე აცხადებს, რომ ტატუნაშვილი ინფარქტით დაიღუპა და მისი ცხედრის ექსპერტიზაზე უარს ამბობს. გარდაცვლილის ცხედარი ოკუპირებულ ცხინვალს 24 თებერვალს უნდა გადმოესვენებინა, თუმცა დე ფაქტო ხელისუფლებამ პოზიცია შეცვალა.

ახალგორში არჩილ ტატუნაშვილთან ერთად დაკავებული იყო საქართველოს კიდევ ორი მოქალაქე. სუს-ის ცნობით, ლევან ქუტაშვილი და იოსებ პავლიაშვილი უკვე ცხინვალის ციხიდან ახალგორში გადაიყვანეს. ოსური მხარე მათ გადმოცემაზე უარს ამბობს.