ამერიკის შეერთებული შტატების სენატში რესპუბლიკელებმა და დემოკრატებმა დროებით შეთანხმებას მიაღწიეს. შედეგად, სენატმა დაამტკიცა აშშ-ს დროებითი ფედერალური ბიუჯეტი, რომელიც საშუალებას მისცემს ფედერალურ მთავრობას, განაახლოს მუშაობა. დროებითი ბიუჯეტი მიმდინარე წლის 8 თებერვლამდეა დამტკიცებული.

მთავარი, რის გამოც დემოკრატებმა რესპუბლიკელებს დროებითი ბიუჯეტის მიღებისას მხარი დაუჭირეს, არის მათი დაპირება, მიუბრუნდნენ პროგრამა DACA-ს საკითხის განხილვას. პროგრამა DACA (The Deferred Action for Childhood Arrivals) არის ობამას მიერ 2012 წელს შექმნილი საემიგრაციო პოლიტიკის ნაწილი. ამ პროგრამის მიხედვით, იმ პირებს, რომლებიც ამერიკის შეერთებულ შტატებში არალეგალურად ჩავიდნენ (ან დარჩნენ) როგორც არასრულწლოვნები და უკვე წლებია ცხოვრობენ, სწავლობენ და მუშაობენ, უფლება მიეცათ, აღნიშნული გააგრძელონ ლეგალურად.

DACA-ს პროგრამა დონალდ ტრამპმა 2017 წლის შემოდგომაზე გააუქმა, რის გამოც 800 ათასზე მეტი პირი, რომლებსაც მეოცნებეებსაც კი უწოდებენ, დადგა ქვეყნიდან დეპორტაციის საფრთხის წინაშე. მათი დიდი ნაწილი ამერიკაში მშობლებთან ერთად პატარა ასაკში დარჩა არალეგალურად. მათი სოციალური კავშირები მთლიანად აშშ-ს უკავშირდება და როგორც წესი, ეს კავშირები საერთოდ არ არის, ან ძალიან სუსტია იმ ქვეყანასთან, სადაც მათ დეპორტაცია ემუქრებათ. სწორედ ამ პროგრამის გაგრძელებას ითხოვენ დემოკრატები და ეს არის რესპუბლიკელებთან დაპირისპირების უმთავრესი მიზეზი, რის გამოც ვერ ხერხდება გრძელვადიანი ფედერალური ბიუჯეტის დამტკიცება.

ბიუჯეტის დაუმტკიცებლობა დიდი პრობლემებს უქმნის აშშ-ს ფედერალურ სამსახურებს, რადგან თანამშრომლების აბსოლუტური უმრავლესობა ამ დროს უხელფასო შვებულებაში გადის. შეფერხებით მუშაობენ აშშ-ს საელჩოები მთელი მსოფლიოს მასშტაბით, მათ შორის, საქართველოშიც.