დღეს, საქართველოს მასშტაბით, ერთიანი ეროვნული გამოცდები დაიწყო. პირველი გამოცდა ქართული ენასა და ლიტერატურაში ჩატარდა.

პირველ სესიაზე დარეგისტრირებული 9 300-ზე მეტი აბიტურიენტიდან გამოცდაზე გამოცხადდა 96,7%. ქვეყნის მასშტაბით დაგვიანების გამო გამოცდაზე 5 აბიტურიენტი არ დაუშვეს.

გამოცდების ეროვნული ცენტრი იუწყება, რომ საქართველოს მასშტაბით გახსნილ ოცდაერთივე საგამოცდო ცენტრში გამოცდა მშვიდ ვითარებაში მიმდინარეობს.

ტელეკომპანია პირველის ეთერში ჩართვისას, გამოცდების ეროვნული ცენტრის ხელმძღვანელმა, მაია მიმინოშვილმა განცხადა, რომ პროცესმა მშვიდ ვითარებაში ჩაიარა და ხარვეზები არ დაფიქსირებულა.

„ეს არის სისტემა, რომელიც რა თქმა უნდა, არის დამოკიდებული როგორც ტექნიკაზე, ისე ელექტროენერგიის მიწოდებაზე, მაგრამ მიუხედავად იმისა, რომ ერთ-ერთ საგამოცდო ცენტრში ელექტროენერგიის მიწოდება ცოტა ხნით შეწყდა, პროცესი არანარიად არ შეფერხებულა და ჩვეულ რეჟიმში გაგრძელდა“.

წელს გამოცდები ნაწილობრივ ელექტრონული ფორმატით ჩატარდება - ფორმატის ცვლილება მხოლოდ ტესტის (და არა პასუხების ფურცლის) ელექტრონულად მიწოდებას ითვალისწინებს.

„ალბათ წარმოგიდგენიათ როგორ ვღელავდით იმიტომ, რომ ძალიან მნიშვნელოვან სიახლეს ვთავაზობდით აბიტურიენტებს, მათ მოუწიათ ნაწილობრივ ელექტრონული ფორმატით გამოცდის ჩაბარება. ამისთვის, ბუნებრივია, მთელი წლის განმავლობაში ძალიან სერიოზულად ვემზადებოდით და პირველი დღე მაინც ნამდვილად ძალიან სანერვიულო იყო ჩვენთვის, მაგრამ ახლა უკვე შემიძლია ვთქვა, რომ მე ძალიან კმაყოფილი ვარ", - თქვა მაია მიმინოშვილმა.

გამოცდების ეროვნული ცენტრის ინფორმაციით, გამოცდებზე დარეგისტრირებულია 38 500-ზე მეტი აბიტურიენტი, საკონკურსო ადგილების რაოდენობა კი 45 000-ს აჭარბებს.

ერთიანი ეროვნული გამოცდები 22 ივლისს ფიზიკის გამოცდით დასრულდება.