ელექტრონული ავტომობილი Tesla Model S ამერიკის შეერთებულ შტატებში პირველ ავტოავარიაში მოყვა გააქტიურებული ავტოპილოტით მოძრაობის დროს, რა დროსაც ავტომობილში მყოფი პირი დაიღუპა. ამის შესახებ ინფორმაცია თავად ტესლამ გაავრცელა კომპანიის ბლოგზე. კომპანიამ უკვე მიმართა აშშ-ს ავტომაგისტრალზე გადაადგილების უსაფრთხოების ეროვნულ ადმინისტრაციას (NHTSA), რათა გამოიძიონ შემთხვევა.

ინციდენტი ცენტრალურ ფლორიდაში, გაყოფილ ავტომაგისტრალზე მოხდა. ტრაილერი ტესლას ავტომობილის პერპენდიკულარულად მოძრაობდა, თუმცა ვერც მძღოლმა, რომელიც მიუხედავად აქტიური ავტოპილოტისა, პასუხისმგებელია ავტომობილის გადაადგილებაზე და ვერც მანქანამ ვერ შენიშნეს ტრაილერი, შესაბამისად მუხრუჭები არ გამოყენებულა, რასაც მოყვა შეჯახება.

ტესლას განცხადებით, კომპანიის მიერ გამოშვებულმა ავტომობილებმა გააქტიურებული ავტოპილოტის რეჟიმში 209 მილიონ კილომეტრზე მეტი გაიარეს და ეს არის პირველი ფატალური ავტოკატასტროფა. ჩვეულებრივი ავტომობილების შემთხვევაში, ფატალური ავარიები საშუალოდ დაახლოებით 151 მილიონ კილომეტრზე მეტი მანძილის გავლისას ხდება.

ტესლას ინფორმაციით, ავტოპილოტის სისტემა ყოველთვის უმჯობესდება, თუმცა ის არ არის სრულყოფილი და მაინც მოითხოვს მძღოლის სიფხიზლეს.

ბლოგპოსტში კომპანია კიდევ ერთხელ ამბობს, რომ მომხმარებლებმა უნდა გაითვალისწინონ, რომ ავტოპილოტის სისტემა „ბეტა-ტესტირების ფაზაშია და მძღოლმა უნდა „შეინარჩუნოს კონტროლი და პასუხისმგებლობა საკუთარ ავტომობილზე“.

ზოგმა ექსპერტმა ტესლა ავტოპილოტის ფუნქციის ნაადრევად წარდგენისთვის გააკრიტიკა. რამდენიმე ავტომწარმოებელმა, რომელიც ავტოპილოტის მსგავს სისტემაზე მუშაობს, მხოლოდ დახურული ტესტირება მოაწყო და განაცხადა, რომ მაშინ ჩაუშვებს სისტემას გაყიდვაში, როდესაც ის მზად იქნება.

Volvo-მ განაცხადა, რომ მაშინ აიღებს სრულ იურიდიულ პასუხისმგებლობას, როდესაც ავტოპილოტის სისტემა იქნება სრულყოფილი. კომპანია მომავალ წელს გეგმავს გაუშვას Drive Me ტექნოლოგიის შეზღუდული, საცდელი ვერსია.