შინაგან საქმეთა სამინისტრო განმარტავს, რომ პროკურატურის განცხადებასა და შს მინისტრის მოადგილის შალვა ხუციშვილის დღევანდელ კომენტარს შორის განსხვავება არ არის.

უწყების განმარტებით, ორივე შემთხვევაში ითქვა, რომ 25 ოქტომბერს თბილისში, ნუცუბიძის პლატოზე მომხდარი ფაქტის ამსახველი სრული ჩანაწერი არ არსებობს, ხოლო ფრაგმენტული ჩანაწერი გამოძიებას მიაწოდეს:

"შალვა ხუციშვილმა განმარტა, რომ შსს-მ მის ხელთ არსებული ყველა ჩანაწერი პროკურატურას გადასცა. მისივე ინფორმაციით, ამ ჩანაწერებზე დაფიქსირებულია გარდაცვლილის ცუდად გახდომის შემდგომი ეპიზოდი, თუმცა, სამწუხაროდ, მათში არ არის ასახული მისი დაკავების მომენტი".

დღეს, 30 ოქტომბერს შს-ს მინისტრის მოადგილემ, შალვა ხუციშვილმა განაცხადა, რომ ჩანაწერები, რომელიც არსებობს, შესაძლოა, ასახავდეს ნუცუბიძის ფერდობზე პირის დაკავების დროს ცუდად გახდომას:

"ჩანაწერებში არის ცუდად გახდომის მომენტი, უბრალოდ არ არის დაკავების მომენტი... კამერების ჩანაწერები არსებობს... იქ არის მომენტები, მათ შორის ცუდად გახდომის მომენტი უნდა ჩანდეს, რამდენადაც მე ვიცი... თუ რატომ არ ჩანს მაგიტომ არის გამოძიება, რომ გასცეს პასუხი და გამოიკითხონ ის პირები ვინც პასუხისმგებელი იყო".

პროკურატურის 29 ოქტომბრის განცხადებაში ნათქვამია, რომ შემთხვევის დროს, ერთ-ერთი პატრულ-ინსპექტორის სამხრე კამერას დაფიქსირებული არ აქვს მომხდარი ინციდენტი და დაკავების პროცესი, რომ მათ ხელთ არსებულ ჩანაწერში ასახულია მხოლოდ გარდაცვლილი პირის ადმინისტრაციულად დაკავების შემდგომი პერიოდი.

25 ოქტომბერს, საღამოს, თბილისში, ნუცუბიძის პლატოზე, მოქალაქეებმა მეზობლური კონფლიქტის გამო საპატრულო პოლიცია გამოიძახეს. უწყების ცნობით, პატრულ-ინსპექტორებმა კონფლიქტი განმუხტეს და მალევე მათთან არაფხიზელ მდგომარეობაში მყოფი ახალგაზრდა მივიდა. შსს-ს მტკიცებით, კაცი განსაკუთრებული აგრესიით გამოირჩეოდა და შეურაცხყოფას აყენებდა მოქალაქეს, რომელმაც საპატრულო პოლიცია გამოიძახა, ასევე, გარშემო მყოფ პირებს და საპატრულო პოლიციის თანამშრომლებს.