ჯანდაცვის, ეკონომიკის და განათლების სფეროებში თანამშრომლობის გაძლიერების მიზნით თურქმენეთთან მემორანდუმები გაფორმდა, — ამის შესახებ ინფორმაციას ჯანდაცვის, ეკონომიკის და განათლების უწყებები ავრცელებენ.

ჯანდაცვის უწყების ცნობით, "ჯანმრთელობის დაცვის სფეროში, ურთიერთთანამშრომლობის მემორანდუმი გაფორმება გულისხმობს, აღნიშნული მიმართულებით, ცოდნისა და გამოცდილების გაზიარებას. ასევე — საგანმანათლებლო და სამედიცინო ტურიზმთან დაკავშირებით, ერთობლივი პროექტების განხორციელებას".

ეკონომიკური და ტექნოლოგიური თანამშრომლობის გაღრმავების მიზნით მემორანდუმი მიზნად ისახავს სამშენებლო მრეწველობის, მაღალი ტექნოლოგიების, კვლევისა და განვითარების, ინოვაციებისა და ტექნიკური რეგლამენტირების მიმართულებით მეგობრული ურთიერთობების გაღრმავებას. აღნიშნული დოკუმენტი ხელს შეუწყობს ეკოლოგიურად სუფთა და რესურსდამზოგველი ტექნოლოგიების შექმნას, ახალი სამშენებლო მასალების წარმოებაში ინოვაციური სამეცნიერო-ტექნიკური გამოცდილების გაზიარებას, სტანდარტიზაციის სფეროში პარტნიორობას, სამრეწველო ნედლეულის ტრანსპორტირების ხელშეწყობას, ერთობლივი ბიზნესფორუმებისა და სემინარების ორგანიზებას.

რაც შეეხება განათლების სფეროში ხელმოწერილ მემორანდუმს, მინისტრის მოადგილეების დონეზე შეიქმნება სამუშაო ჯგუფები, რომელთა წარმომადგენლები იმუშავებენ, განათლების, მეცნიერების და ახალგაზრდობის სფეროებში ერთობლივი პროექტების, მათ შორის გაცვლითი პროგრამების, განხორციელებაზე.