ბელორუსის ლიდერმა, ალექსანდრე ლუკაშენკომ, საპარლამენტო არჩევნების წინ, სომხეთის მოქალაქეებს მოუწოდა, "ძალიან ფრთხილად იყვნენ, რათა, ღმერთმა ნუ ქნას და არ განმეორდეს ის, რაც უკრაინაში მოხდა". მისი გამოსვლა 29 მაისს ასტანაში ევრაზიის ეკონომიკური კავშირის (EAEU) სამიტზე Telegram-ის არხმა Pul Pervogo-მ გაავრცელა

"უკრაინაში ყველაფერი ზუსტად ასე დაიწყო", — თქვა ლუკაშენკომ და გაიმეორა ვლადიმერ პუტინის არგუმენტი.

ასტანაში გამართულ პრესკონფერენციაზე პუტინმა განაცხადა, რომ უკრაინაში კრიზისი, სავარაუდოდ, კიევის ევროკავშირში გაწევრიანების მცდელობით დაიწყო, რასაც ახლა ერევანიც ახორციელებს.

ბელორუსის ლიდერმა მოუწოდა სომხეთის მოქალაქეებს, "ძალიან სერიოზულად დაფიქრდნენ", სანამ EAEU-ს ხარჯზე ევროკავშირთან უფრო მჭიდრო კავშირებს დაამყარებენ: "ეს ერთადერთია, რისი გაკეთებაც მე მოვუწოდებ მათ", — თქვა ლუკაშენკომ.

იმ დღეს, ევრაზიული ეკონომიკური კავშირის წევრი სახელმწიფოების ლიდერებმა ერთობლივი განცხადება გაავრცელეს, რომელშიც სომხეთს რეფერენდუმის ჩატარება მოსთხოვეს ევროკავშირში გაწევრიანების ან ევრაზიულ ეკონომიკურ კავშირში დარჩენის შესახებ, რომელშიც, რუსეთისა და სომხეთის გარდა, ბელარუსი, ყაზახეთი და ყირგიზეთი შედიან. ვლადიმერ პუტინმა ერევანს ეკონომიკური შედეგებით დაემუქრა, თუ ის ევრაზიულ ეკონომიკურ კავშირს დატოვებს.