მთავრობის განკარგულებით, ზოგადსაგანმანათლებლო დაწესებულებების ნაწილობრივი რეაბილიტაციისთვის საქართველოს რეგიონებში განსახორციელებელი პროექტების ფონდიდან, დამატებით 80 მილიონი ლარი გამოიყოფა. 15 მაისით დათარიღებულ განკარგულებას ხელს ირაკლი კობახიძე აწერს.

დოკუმენტის მიხედვით, ფინანსთა სამინისტრო ვალდებულია, საქართველოს რეგიონებში განსახორციელებელი პროექტების ფონდი 80 მილიონი ლარით გაზარდოს "საჯარო სკოლების მშენებლობა-რეაბილიტაციის" ქვეპროგრამის ასიგნებები შეამცირების ხარჯზე.

"1. ცნობად იქნეს მიღებული, რომ საქართველოს რეგიონული განვითარების სამინისტრომ დააყენა საკითხი, მუნიციპალიტეტების მიერ ზოგადსაგანმანათლებლო დაწესებულებების ნაწილობრივი რეაბილიტაციის უზრუნველყოფის მიზნით, მისთვის დამატებით 80 000 000 (ოთხმოცი მილიონი) ლარის გამოყოფის თაობაზე.

2. ამ განკარგულების პირველი პუნქტით განსაზღვრული ღონისძიებების განხორციელების მიზნით, დაევალოს საქართველოს ფინანსთა სამინისტროს:

ა) "საქართველოს 2026 წლის სახელმწიფო ბიუჯეტის შესახებ" საქართველოს კანონით გათვალისწინებული საქართველოს რეგიონებში განსახორციელებელი პროექტების ფონდის 80 000 000 (ოთხმოცი მილიონი) ლარით გაზრდა, საქართველოს ინფრასტრუქტურის სამინისტროს "საჯარო სკოლების მშენებლობა-რეაბილიტაციის" ქვეპროგრამის ასიგნებების შემცირების ხარჯზე;

ბ) "საქართველოს 2026 წლის სახელმწიფო ბიუჯეტის შესახებ" საქართველოს კანონით გათვალისწინებული საქართველოს რეგიონებში განსახორციელებელი პროექტების ფონდიდან საქართველოს რეგიონული განვითარების სამინისტროსთვის 80 000 000 (ოთხმოცი მილიონი) ლარის გამოყოფა, მუნიციპალიტეტების მიერ ზოგადსაგანმანათლებლო დაწესებულებების ნაწილობრივი რეაბილიტაციის უზრუნველყოფის მიზნით", — წერია განკარგულებაში.