"მე ვისურვებდი ბრიუსელის ჩინოვნიკები ადამიანის უფლებების მდგომარეობას ევროკავშირში სერიოზულად მიუდგნენ", — ამის შესახებ შალვა პაპუაშვილმა ჟურნალისტებთან საუბრისას განაცხადა. მისივე თქმით, საქართველოს ხელისუფლება "იქით ასწავლის ყველას, რას ნიშნავს ევროპელობა და რას ნიშნავს ადამიანის უფლებები".

"მე ვისურვებდი ბრიუსელის ჩინოვნიკები ადამიანის უფლებების მდგომარეობას ევროკავშირში სერიოზულად მიუდგნენ. არა მხოლოდ ჩვენ, ამერიკის შეერთებული შტატებისგანაც კიდევ უფრო მწვავე კრიტიკა მიიღეს. ვხედავთ, რომ ადამიანის უფლებების მდგომარეობა ევროკავშირში დღითიდღე უარესდება, რაც გამოხატვის თავისუფლებას ეხება. კოპენჰაგენი არ არის ცალკეული გამონაკლისი. ჩვენ იგივე სურათები მშვიდობიანი მიტინგების დარბევის დროს ბერლინში, პარიზში, სხვა დედაქალაქებშიც ვიხილეთ. კოპენჰაგენში ეს განსაკუთრებული ბრუტალურობა იყო, როდესაც ხელკეტებით და ძაღლებით დაარბიეს მშვიდობიანი დემონსტრანტები მაშინ, როდესაც არანაირ საფრთხეს არავისთვის არ წარმოადგენდნენ. როგორც ჩანს, დანიის პოლიცია არ აპირებს, რომ გამოიძიოს ეს დარბევა და მნიშვნელოვანია გამოძიებული იქნას და დამნაშავეები დაისაჯონ. [...]

ჩვენ უნდა გავითავისუფლოთ თავი იმ კომპლექსებისგან, რომელსაც ცდილობდნენ, რომ წლების განმავლობაში მოეხვიათ ქართველი ხალხისთვის, თითქოს ჩვენ ვართ რაღაც მეორეხარისხოვანი, განუვითარებელი ერი, თითქოს დანიამ, თუ გერმანიამ, თუ სხვა ქვეყანამ უნდა გასწავლოს როგორი არის სწორი ცხოვრება, როგორია სწორი ევროპელობა, როგორ არის სწორად ქვეყნის შენება. იქით ვასწავლით ყველას, რას ნიშნავს ევროპელობა და რას ნიშნავს ადამიანის უფლებები. ამიტომ, ჩვენ უნდა მოვიცილოთ ეს გარედან ძალად მოხვეული კომპლექსი, რომ თითქოს ჩვენ აქ ვართ მოწაფეები და კლასის დამრიგებლად ზოგიერთი ქვეყნების წარმომადგენლები გვყვანან, რომელსაც გენოციდთან გათანაბრებული დანაშაულები აქვთ ჩადენილი საკუთარი მოსახლეობის წინააღმდეგ და დღემდე არ აქვთ ეს საკითხები გამოძიებული. დღემდე დანიაში იმ სისტემური დანაშაულისთვის, რომელიც ევროკავშირის წევრ დანიაში ხდებოდა არავინ არ არის დასჯილი," — განაცხადა პაპუაშვილმა.

შეგახსენებთ, ირაკლი კობახიძემ საგანგებო ბრიფინგზე ევროპული სტრუქტურების წარმომადგენლებისთვის მიწერილი ღია წერილი წაიკითხა, რომელშიც პარტია ქართული ოცნება ევროკომისიის პრეზიდენტს, ურსულა ფონ დერ ლაიენს, ევროსაბჭოს პრეზიდენტს, ანტონიო კოშტას და ევროპარლამენტის პრეზიდენტს, რობერტა მეცოლას დანიის დედაქალაქ კოპენჰაგენში განვითარებულ მოვლენებთან დაკავშირებით მიმართავს.

რაც შეეხება კოპენჰაგენში განვითარებულ მოვლენებს, მიმდინარე წლის 13 მაისს, დანიის დედაქალაქში პროპალესტინელი აქტივისტები კომპანია Maersk-ის მიერ ისრაელისთვის, შესაძლო, სამხედრო ტვირთების მიწოდებას აპროტესტებდნენ. მათ კომპანიის სათავო ოფისის ბლოკირება მოახდინეს, რის შემდეგაც პოლიციამ საპროტესტო აქციის მონაწილეების დაშლისას გაწვრთნილი ძაღლები და ხელკეტები გამოიყენა. აქციაზე 20-მდე აქტივისტი დააკავეს.