ლეიბორისტული პარტიის ლიდერი შალვა ნათელაშვილი სამების საკათედრო ტაძარში მიმდინარე პატრიარქის არჩევნებს ეხმაურება და ღონისძიებების სტუმრებზე წერს, რომ "პატრიარქის არჩევას ესწრება, ქვეყნის მთავარი ოკუპანტის, პრეზიდენტ პუტინის მთელი სპეცსამსახური — რუსეთის ფედერალური უშიშროების სამსახურიდან ლევან ვასაძე, ბორტნიკოვის სპეცსამსახურიდან მაკა ასათიანი, კგბ-ს საბჭოთა პერიოდის რეზიდენტი, ერის დაუძინებელი მტერი გოგა ხაინდრავა, ასევე ბანდიტი ოლიგარქი პაპაშვილი და მთელ ამ პროცესს კი დისპეტჩრობს რუსეთის საგარეო დაზვერვის რეზიდენტი მილიარდერი ვანო ჩხარტიშვილი".

"ამ ცხოვრებაში ბევრ რამეს თუნდაც უსიამოვნოს შეიძლება, სამწუხაროდ, გაგებით შევხვდე,მაგრამ მე ვერასოდეს მივიღებ და გავიგებ იმ ფაქტს, რომ საქართველოს პატრიარქის არჩევას ესწრება, ქვეყნის მთავარი ოკუპანტის, პრეზიდენტ პუტინის მთელი სპეცსამსახური — რუსეთის ფედერალური უშიშროების სამსახურიდან ლევან ვასაძე, ასევე ბორტნიკოვის სპეცსამსახურიდან მაკა ასათიანი, კგბ-ს ჯერ კიდევ საბჭოთა პერიოდის რეზიდენტი,ერის დაუძინებელი მტერი გოგა ხაინდრავა,ასევე ბანდიტი ოლიგარქები, პაპაშვილი და სხვა ჩუმად,უკანა კარიდან შეპარულნი.მთელ ამ პროცესს კი დისპეტჩერობს ეროვნული ბოროტება, რუსეთის საგარეო დაზვერვის რეზიდენტი,მილიარდერი ვანო ჩხარტიშვილი. იქნებ პასუხი გაგვცენ — ვინ გამოუწერა ამ კრემლის ყურებს საშვები? ნუ გადააქცევთ ამ დღეს მაინც პუტინის ბენეფისად,მით უფრო გუშინ ცხინვალის რეგიონი ამ დიქტატორმა პრაქტიკულად მიუერთა რუსეთის ფედერაციას", — წერს შალვა ნათელაშვილი სოციალურ ქსელში.

გაფართოებული კრება სამების საპატრიარქო ტაძარში, სადაც საქართველოს მომავალი პატრიარქი უნდა აირჩიონ, 13:00 საათზე დაიწყო. კენჭისყრა სამ კანდიდატს შორის გაიმართება, რომლებიც 28 აპრილს საპატრიარქოში გამართულ სინოდის სხდომაზე შეირჩნენ. ესენი არია: სენაკისა და ჩხოროწყუს მიტროპოლიტი და საპატრიარქო ტახტის მოსაყდრე შიო, მროველ-ურბნელი მიტროპოლიტი იობ აქიაშვილი და ფოთისა და ხობის მიტროპოლიტი გრიგოლ ბერბიჭაშვილი. კენჭისყრაზე გამარჯვებისთვის საჭიროა, რომ სამი კანდიდატიდან რომელიმემ მოაგროვოს 39 ხმიდან ნახევარზე მეტი, 20 ხმა.

28 აპრილს გამართულ სინოდის სხდომაზე საპატრიარქო ტახტის მოსაყდრე შიომ 20 ხმა მიიღო, მიტროპოლიტებმა გრიგოლმა და იობმა 7-7 ხმა.

საპატრიარქოს ცნობით, მორწმუნეებს სამების ტაძრის ეზოში ფეხით შესვლა შეუფერხებლად შეეძლებათ. მათივე ცნობით, ეზოში დიდი ეკრანებია დამონტაჟებული, საიდანაც საზოგადოებას შეეძლება, თვალი ადევნოს კრების მუშაობას.