რუსეთის მიერ განხორციელებული დარტყმები უკრაინის მიერ ცალმხრივად შეთავაზებული ცეცხლის შეწყვეტის რეჟიმის ამოქმედებამდე რამდენიმე საათით ადრე დაიწყო. ვოლოდიმირ ზელენსკიმ მოსკოვის ქმედებები "ცინიკურ და ბოროტ" თავდასხმად შეაფასა. ინფორმაციას Deutsche Welle ავრცელებს.

ოთხშაბათს, უკრაინულმა მხარემ განაცხადა, რომ რუსეთმა კიევის მიერ გამოცხადებული ცეცხლის შეწყვეტის პირობა დაარღვია და ღამის განმავლობაში უკრაინის ქალაქებზე იერიში 100-ზე მეტი საბრძოლო დრონითა და სამი რაკეტით მიიტანა. სამშაბათს, გვიან ღამით, უკრაინის აღმოსავლეთ ნაწილში რუსული დარტყმების შედეგად სულ მცირე 27 ადამიანი დაიღუპა და ათეულობით დაშავდა. ეს მოხდა სულ რამდენიმე საათით ადრე, სანამ კიევის მიერ შეთავაზებული ზავი ოთხშაბათს, შუაღამისას შევიდოდა ძალაში.

"უკრაინის მიერ ინიცირებული ცეცხლის შეწყვეტის რეჟიმის ამოქმედებამდე სულ რამდენიმე საათი რჩება, თუმცა რუსეთი არ ამჟღავნებს საომარი მოქმედებების შეჩერების ნიშნებს. პირიქით, მოსკოვი აძლიერებს ტერორს," — დაწერა სოციალურ ქსელში უკრაინის საგარეო საქმეთა მინისტრმა ანდრეი სიბიჰამ.

ოთხშაბათს, მან დააზუსტა, რომ რუსეთმა დაარღვია უკრაინის ცალმხრივი ზავი და ქალაქების მიმართულებით 108 საბრძოლო დრონი და სამი რაკეტა გაუშვა.

"ეს ცხადყოფს, რომ რუსეთი უარყოფს მშვიდობას, ხოლო მისი ფსევდო მოწოდებები 9 მაისს ცეცხლის შეწყვეტის შესახებ დიპლომატიასთან კავშირში არ არის. პუტინს მხოლოდ სამხედრო აღლუმები ადარდებს და არა ადამიანების სიცოცხლე", — აღნიშნა სიბიჰამ X-ზე, სადაც კრემლის ინიციატივას გამოეხმაურა, რომელიც 9 მაისის აღლუმის დროს საომარი მოქმედებების შეჩერებას ითვალისწინებდა.