ყოფილი სახალხო დამცველი უჩა ნანუაშვილი სახელმწიფო უსაფრთხოების სამსახურში გამოკითხვაზე დაიბარეს. მისი თქმით, სუს-ის შეკითხვები უკავშირდება საერთაშორისო ექსპერტებთან თანამშრომლობასა და მათთვის ინფორმაციის მიწოდებას, რითაც ხელისუფლება არღვევს მოსკოვის მექანიზმის მოთხოვნას, რომ დაიცვან თითოეული იმ ადამიანის და ორგანიზაციის ვინც ითანამშრომლებს ექსპერტთან.

"მე დავეხმარე ექსპერტს იმ კონკრეტულ საქმეებზე, რაზეც მას ჰქონდა კითხვები. დაკავშირება სურდა რამდენიმე საკითხთან დაკავშირებით, აინტერესებდა ანგარიშები, რომელიც ჩვენ გვქონდა მომზადებული ბოლო რამდენიმე წლის განმავლობაში. რა თქმა უნდა, მე მას ყველაფერში დავეხმარე და მივაწოდე ეს ინფორმაცია. ეს არის უბრალოდ დაშინება, სამოქალაქო საზოგადოების რომ არავის მომავალში აღარ ჰქონდეს სურვილი იკონტაქტოს საერთაშორისო ორგანიზაციასთან.

მეექვსე პუნქტი მოსკოვის მექანიზმის დოკუმენტის, წევრ სახელმწიფოებს ავალდებულებს, დაიცვან თითოეული იმ ადამიანის და ორგანიზაციის უფლებები, არ შეუქმნან რაიმე პრობლემა, ვინც ითანამშრომლებს ექსპერტთან. ეს არის დამატებითი მექანიზმი, რომ დაცული იყოს ყველა ის პირი, ვისაც კომუნიკაცია ექნება ეუთოს ექსპერტთან. ჩვენს შემთხვევაში ვხედავთ, რომ ეს მოთხოვნა უკვე დარღვეულია საქართველოს ხელისუფლების მიერ", — განაცხადა უჩა ნანუაშვილმა "ტვ პირველის" ეთერში.

ყოფილი სახალხო დამცველი, უჩა ნანუაშვილი, თბილისის საქალაქო სასამართლოში მაგისტრატი მოსამართლის წინაშე მისცემს ჩვენებას.