ახალციხის მუნიციპალიტეტის მერიამ ქალაქის მთავარ დასასვენებელ ზონაში, ტბის პირველ ზოლში, 11-სართულიანი კორპუსის მშენებლობის ნებართვა მმართველი პარტიის მსხვილ შემწირველებზე გასცა. ამის შესახებ ინფორმაციას "საერთაშორისო გამჭვირვალობა — საქართველო" (TI) ავრცელებს.

როგორც TI წერს, მიუხედავად იმისა, რომ მერიამ ტბის რეაბილიტაციაზე 2 მილიონამდე ლარი დახარჯა და მას საჯაროდ "რეკრეაციულ ზონას" უწოდებს, ტერიტორიას ოფიციალური სტატუსი მაინც არ აქვს, რადგან მუნიციპალიტეტმა დაპირებული განაშენიანების გენერალური გეგმა დღემდე არ შეიმუშავა.

TI-ის ცნობით, კორპუსს შპს "მაქსტერრა" აშენებს. კომპანია 2025 წლის ივნისში მამუკა კუპრაძემ დააფუძნა, რომელმაც მიწის შეძენისა და ნებართვის მიღებისთანავე წილები ქართული ოცნების შემწირველებს — იმედა მუმლაძესა და იაკობ კუბლაშვილს გადაუფორმა.

TI-ის ინფორმაციით, პროექტის ბენეფიციარებს მმართველი პარტიის სასარგებლოდ, ჯამში, 160 000 ლარი აქვთ გაღებული. გარდა ამისა, იაკობ კუბლაშვილის მამის კომპანიას სახელმწიფო ტენდერებიდან 3 მილიონ ლარზე მეტი აქვს მიღებული.

როგორც TI წერს, იმედა მუმლაძე ადრეც ფიგურირებდა სკანდალში, როდესაც მისმა კომპანიამ სახელმწიფო მიწაზე ბენზინგასამართი სადგური უნებართვოდ ააშენა, თუმცა სახელმწიფომ ნაკვეთი აუქციონზე მოგვიანებით მაინც მას მიჰყიდა.

ყოფილი მერის, ირაკლი ლაზარაშვილის დაპირების მიუხედავად, რომ ქალაქი "დამახინჯებულ განაშენიანებას" აირიდებდა, მან უფლებამოსილების ვადის ამოწურვამდე სწორედ ამ მაღალსართულიანი კორპუსის მშენებლობას მოაწერა ხელი. TI აღნიშნავს, რომ ეს გარემოებები მიუთითებს კორუფციულ რისკებსა და საზოგადოებრივი ინტერესების უგულებელყოფაზე, რაც საგამოძიებო ორგანოების მხრიდან რეაგირებას საჭიროებს.