ღამით პარლამენტთან ერთ-ერთ კარავს ცეცხლი გაუჩნდა, რის შემდეგაც სამართალდამცავებმა ტერიტორიიდან კარვები აიღეს.

დარეჯან ცხვიტარიამ NEWS.On.ge-თან საუბრისას განაცხადა, რომ ღამით პარლამენტთან ერთ-ერთ კარავს იმ დროს გაუჩნდა ცეცხლი, როდესაც კარვებში მყოფებს ეძინათ. მას შემდეგ, რაც ცეცხლის ჩაქრობა მოახერხეს, ცხვიტარიას განცხადებით, დილის 7 საათზე პოლიციამ კარავში მყოფ პირებს ძალის გამოყენებით დაატოვებინა ტერიტორია და დაკითხვაზე გადაიყვანეს. ცხვიტარიას დაკითხვის შემდეგ დაბლოკილი ტელეფონი დაუბრუნეს.

პროევროპული აქციების დაწყებიდან დარეჯან ცხვიტარია ღამეს პარლამენტთან ათენებს. მისი თქმით, "პოლიციამ ის, ფაქტობრივად, გაქურდა" და წაღებულ პირად ნივთებს არ უბრუნებენ. პარლამენტთან კარვებში მყოფების ვერსიით, კარავს ცეცხლი განზრახ წაუკიდეს, რათა პარლამენტის წინ ტერიტორია მოესუფთავებინათ.