პენიტენციური სამსახური გზის გადაკეტვის ბრალდებით დაკავებული ზურა მენთეშაშვილის ადვოკატის განცხადებას ეხმაურება. სამსახური უარყოფს იმ ფაქტს, რომ მენთეშაშვილი "შიმშილობის შეწყვეტის მიზნით ზეწოლის გამო გადაყვანილ იქნა კარცერში, სადაც ის იმყოფება არაადამიანურ პირობებში".

"საზოგადოების ინფორმირების მიზნით განვმარტავთ, რომ ბრალდებული ზურაბ მენთეშაშვილი არ იმყოფება სამარტოო საკანში (ე.წ კარცერი). პენიტენციური კოდექსისა და დაწესებულების მოთხოვნათა შესაბამისად, ბრალდებული დროებით განთავსებულია შიდა კლასიფიკაციის საკანში (ე.წ საკარანტინე საკანი)," — ვკითხულობთ განცხადებაში.

პენიტენციური სამსახურის განმარტებით, მას შემდეგ, რაც დაკავებიდან მალევე მენთეშაშვილმა შიმშილობა გამოაცხადა, ის სხვა მოშიმშილე პატიმრების საკანში განათავსეს. სამსახურის მტკიცებით, "ვინაიდან ზურაბ მენთეშაშვილი ჩვეულებრივ იღებდა და იღებს საკვებს და ასევე სარგებლობდა დაწესებულების ტერიტორიაზე არსებული მაღაზიით, მისი გაჩერება ვერ მოხდებოდა მოშიმშილე პირებთან ერთად".

სამსახურმა განცხადებასთან ერთად გაავრცელა კადრები, რომელიც 2026 წლის 8 იანვრით არის დათარიღებული. სამსახურის განმარტებით, მენთეშაშვილის და ზურაბ ჭავჭანიძის საკნის 24-საათიანი ვიდეომეთვალყურეობა მიმდინარეობს, რადგან მათი ადვოკატები "ხშირად შიმშილობაზე ცრუ ინფორმაციას ავრცელებენ".

"მიუხედავად იმისა, რომ ზურაბ ჭავჭანიძეს და ზურაბ მენთეშაშვილს გამოცხადებული აქვთ შიმშილობა, ორივე ბრალდებული იკვებება სრულყოფილად, იღებენ როგორც დაწესებულების მიერ მიწოდებულ, ასევე მაღაზიაში შეძენილ საკვებს, რაც დასტურდება შესაბამისი დოკუმენტაციით," — წერს სამსახური.

პენიტენციური სამსახური ასევე უარყოფს იმ ფაქტს, რომ პროევროპულ აქციებზე დაკავებული დენის კულანინი შიმშილობს.

შეგახსენებთ, მენთეშაშვილის ადვოკატმა, ჯანო ჭკადუამ განაცხადა, რომ მისი დაცვის ქვეშ მყოფი კარცერშია გადაყვანილი — მენთეშაშვილმა არ იცის კარცერში გადაყვანის მიზეზი, მაგრამ ეჭვობს, რომ ეს შიმშილობის გამო მოხდა. მენთეშაშვილი 2025 წლის 1-ელ ნოემბერს დააკავეს და მას შემდეგ შიმშილობს.

• ადვოკატების თქმით, ზურა მენთეშაშვილს და დენის კულანინს კარცერში სიბინძურეში ამყოფებენ და ბანაობის საშუალებას არ აძლევენ

დენის კულანინის ადვოკატის, დიმიტრი ნოზაძის განცხადებით, მისი დაცვის ქვეშ მყოფი კარცერში ყოველგვარი ახსნა-განმარტების გარეშე გადაიყვანეს.

6 მარტით დათარიღებულ წერილში, დენის კულანინი წერს, რომ მას და ზურა მენთეშაშვილს ტელეფონის გამოყენება და ბანაობას აუკრძალეს და არც სარეცხის გარეცხვის უფლებას აძლევენ. პატიმრები საკანში სახალხო დამცველის შესვლას ითხოვენ.

"ამ მომენტში გვამყოფებენ ტარაკნებს შორის, სრული ანტისანიტარიის პირობებში, ჭუჭყიანი ჭურჭლით. ოთახში სიგარეტის კვამლია და ვენტილაცია არ მუშაობს.
არ გვაძლევენ ჩვენს პირად ნივთებს, არ გვაძლევენ რვეულს და კალამს, ჩამოგვართვეს სასამართლოებისთვის საჭირო პირადი დოკუმენტები და პირადი წერილები," — წერს კულანინი.