ჯეკ უაითმა, The White Stripes, The Raconteurs და The Dead Weather დამფუძნებელმა და 12-გზის გრემის მფლობელმა მუსიკოსმა თქვა, რომ საჯარო დაშორებებზე სიმღერების წერა "ტეილორ სვიფტის სტილში" მისთვის საერთოდ არ არის "საინტერესო".

50 წლის ფრონტმენს საკუთარ შემოქმედებაში ავტობიოგრაფიული დეტალების გამოყენების შესახებ ჰკითხეს, რაზეც მან სვიფტი ახსენა, მომღერალი, რომლის გახმაურებულმა რომანტიკულმა ურთიერთობებმაც მის კარიერაში არაერთი სიმღერა წარმოშვა.

საყოველთაოდ მიჩნეულია, რომ სვიფტი სიმღერებს თავის ყოფილ პარტნიორებზე წერს, მათ შორის მუსიკოსებზე: ჯო ჯონასსა და მეთი ჰილიზე, და მსახიობ ჯო ელვინზე. ბოლო პერიოდში კი მის შემოქმედებაზე გავლენას ახდენს მიმდინარე ურთიერთობა თავის საქმროსთან, NFL-ის მოთამაშე ტრევის კელსისთან.

"არის თუ არა თქვენი რომელიმე სიმღერა სრულად ავტობიოგრაფიული?" — ჰკითხეს უაითს The Guardian-ისთვის მიცემულ ახალ ინტერვიუში.

"არა, დიდად არა", — უპასუხა უაითმა — "ახლა ძალიან პოპულარული გახდა ტეილორ სვიფტისეული მეთოდი, როცა პოპ-მომღერლები თავიანთ ყველა საჯაროდ განხილულ დაშორებაზე წერენ, რაც ჩემთვის სრულიად უინტერესოა. ვფიქრობ, საკუთარ თავზე წერა ცოტა მოსაწყენია.

მაშინაც კი, თუ მართლა საინტერესო დღე მქონდა, ვგრძნობ, რომ ეს უკვე გამოვცადე და არ მჭირდება მისი ხელახლა გაცოცხლება ყოველ ჯერზე, როცა ამ სიმღერას ვმღერი", — განაგრძო მან — "თუ ეს რაღაც ნამდვილად მტკივნეულია, მაშინ საჯაროდ არ გამოვიტან იმისთვის, რომ ინტერნეტში რომელიმე იდიოტმა ფეხქვეშ გათელოს".

უაითმა ასევე თქვა, რომ სიმღერებში თავისი პირადი გამოცდილების მხოლოდ ნაწილს დებს: "ამიტომ, ჩემს საქმეში გამოცდილების მხოლოდ გარკვეულ პროცენტს ვიყენებ და შემდეგ მას სხვის პერსონაჟად გარდავქმნი. საკუთარ თავზე ვერაფერს ვისწავლი, სანამ სხვის ტყავში არ შევალ".

36 წლის სვიფტმა კრიტიკოსთა აღიარება და ერთგული ფანების არმია სწორედ თავისი "აღსარებითი" სიმღერების წერის სტილით მოიპოვა.

მაგალითად, 2012 წლის სიმღერაზე All Too Well ვარაუდობდნენ, რომ მის ყოფილ ბოიფრენდზე, მსახიობ ჯეიკ ჯილენჰოლზე დაიწერა, თეორია, რომელიც თითქმის დადასტურდა, როდესაც სვიფტმა 2021 წლის განახლებულ ვერსიაში ტექსტი ჩაამატა.

ტეილორ სვიფტმა სწორედ საკუთარი ცხოვრების დეტალების გასაჯაროებით შექმნა გლობალური ფენომენი. დღეს ის 14 გრემის მფლობელი და პირველი მუსიკოსი-მილიარდერია, რომელმაც ეს სტატუსი მხოლოდ შემოქმედებით მოიპოვა. სვიფტი ერთადერთი არტისტია, რომელმაც წლის ალბომის ნომინაციაში ოთხჯერ გაიმარჯვა, რაც მის სტილს კომერციულად ყველაზე მომგებიანად აქცევს და მისი გავლენა ინდუსტრიაზე იმდენად დიდია, რომ მას ხშირად თანამედროვეობის ერთ-ერთ ყველაზე მნიშვნელოვან სიმღერების ავტორად მოიხსენიებენ.