ვენესუელის ოპოზიციის ლიდერმა მარია კორინა მაჩადომ თეთრ სახლში გამართულ შეხვედრაზე აშშ-ის პრეზიდენტ დონალდ ტრამპს ნობელის მშვიდობის პრემიის მედალი გადასცა, რომელსაც 2025 წელს მიიღო.

"მე აშშ-ის პრეზიდენტს ნობელის მშვიდობის პრემიის მედალი გადავეცი", — განუცხადა მან ჟურნალისტებს შეხვედრის შემდეგ და ტრამპთან შეხვედრას "ისტორიული" და "წარმოუდგენელი" უწოდა.

მოგვიანებით ტრამპმა Truth Social-ზე დაწერა, რომ მაჩადო "შესანიშნავი ქალია, რომელმაც ბევრი რამ გადაიტანა".

"დიდი პატივი იყო დღეს ვენესუელელი მარია კორინა მაჩადოსთან შეხვედრა. ის შესანიშნავი ქალია, რომელმაც ბევრი რამ გადაიტანა. მარიამ ჩემი საქმიანობისთვის ნობელის მშვიდობის პრემია გადამცა. ეს ურთიერთპატივისცემის მშვენიერი ჟესტი იყო. გმადლობთ, მარია!" — თქვა აშშ-ის პრეზიდენტმა.

მას შემდეგ, რაც აშშ-მ ვენესუელას შეუტია და პრეზიდენტი ნიკოლას მადურო დაატყვევა, მაჩადომ განაცხადა, რომ ოპოზიცია მზად იყო ვენესუელაში ძალაუფლების ხელში ჩასაგდებად. ვენესუელაზე თავდასხმის შემდეგ გამართულ პრესკონფერენციაზე ტრამპმა განაცხადა, რომ მაჩადოსთვის ქვეყნის ლიდერობა რთული იქნებოდა. მან მას "კარგი ქალი" უწოდა, თუმცა, მისი თქმით, მას ვენესუელაში "არ აქვს მხარდაჭერა და პატივისცემა".

თეთრი სახლის წყაროებზე დაყრდნობით, "ვაშინგტონ პოსტი" იტყობინება, რომ ტრამპმა უარი თქვა მაჩადოს მხარდაჭერაზე, რადგან მან უარი თქვა მისთვის ნობელის პრემიის დათმობაზე. "თუ მას უარი ეთქვა [ნობელის პრემიაზე] და ეთქვა: "მე არ შემიძლია მისი მიღება, რადგან ის დონალდ ტრამპს ეკუთვნის", ის დღეს ვენესუელას პრეზიდენტი იქნებოდა", — თქვა გამოცემის ერთ-ერთმა წყარომ.

მაჩადოს ნობელის პრემია მშვიდობის დარგში 2025 წლის ოქტომბერში მიენიჭა. მაშინ მან ჯილდოს "ყველა ვენესუელელის ბრძოლის აღიარება“ უწოდა, რაც "თავისუფლების მოპოვების" სტიმულს წარმოადგენდა. მან პრიზი "ვენესუელას ტანჯულ ხალხს და პრეზიდენტ ტრამპს ჩვენი საქმის მტკიცე მხარდაჭერისთვის" მიუძღვნა.

ნობელის კომიტეტმა განაცხადა, რომ ნობელის პრემიის გამოცხადების შემდეგ "მისი გაუქმება, გაყოფა ან გადაცემა შეუძლებელია".