უკრაინული მედია მთავარ სადაზვერვო სამმართველოზე (გურ) დაყრდნობით იუწყება, რომ
ჩეჩნეთის ლიდერის, რამზან კადიროვის ჯანმრთელობის მდგომარეობა გაუარესდა. ის თირკმლის უკმარისობის გამო კლინიკაში დიალიზს გადის.

გურ-ს წყაროები იუწყებიან, რომ კადიროვი, სავარაუდოდ, ჩეჩნეთში, საკუთარ საავადმყოფოში იმყოფება — ოჯახის წევრები, მათ შორის სხვა ქვეყნებიდან, მის სანახავად ჩავიდნენ.

Interfax-Ukraine და Ukrinform წერენ, რომ კადიროვის ჯანმრთელობის მდგომარეობის გაუარესების ფონზე, "ჩეჩნეთის ახალი ლიდერის კანდიდატის იდენტიფიცირების პროცესი მნიშვნელოვნად გააქტიურდა“.

გურ-მ ადრეც გაავრცელა ინფორმაცია კადიროვის ჯანმრთელობის გაუარესების შესახებ. კერძოდ, 2023 წლის 15 სექტემბერს, მთავარი სადაზვერვო სამმართველოს წარმომადგენელმა ანდრეი იუსოვმა განაცხადა, რომ კადიროვი ძალიან მძიმე მდგომარეობაში იყო.

Interfax-Ukraine-ს წყაროებმა აღნიშნეს, რომ კრემლისთვის ჩეჩნეთის ლიდერის პოსტზე ყველაზე მისაღებ ფიგურებს შორის არიან: ჩეჩნეთის პარლამენტის თავმჯდომარე: მაგომედ დაუდოვი, მოხალისეთა ფორმირება "ახმატის" მეთაური აპტი ალაუდდინოვი და რამზანის უფროსი ვაჟი, ახმატ კადიროვი.