ევროპის საბჭოს კომისარი ადამიანის უფლებების საკითხებში მაიკლ ო’ფლაერტი საქართველოს გენერალურ პროკურორს გიორგი გვარაკიძეს წერილ უგზავნის და მოუწოდებს, რომ 2024 წლის საპროტესტო აქციების დროს პოლიციის სავარაუდო ძალადობის ფაქტები სათანადოდ გამოიძიონ. ამის შესახებ ინფორმაციას ევროპის საბჭო ავრცელებს.

"დღეს გამოქვეყნებულ წერილში, ევროპის საბჭოს ადამიანის უფლებათა კომისარმა, მაიკლ ო’ფლაერტიმ, შეშფოთება გამოთქვა საქართველოს გენერალურ პროკურორს 2024 წლის ბოლოს სამართალდამცავი ორგანოების მიერ მომიტინგეებისა და ჟურნალისტების წინააღმდეგ ძალის არაპროპორციული გამოყენების სავარაუდო გამოძიებებში ხელშესახები პროგრესის არარსებობის გამო.

კომისარი შეშფოთებას გამოთქვამს სპეციალური საგამოძიებო სამსახურის მიერ დაწყებული და პროკურატურისთვის გადაცემული გამოძიებების ეფექტურობაზე. მიუხედავად იმისა, რომ მომიტინგეების წინააღმდეგ სისხლის სამართლის საქმეები წინ წავიდა და გამამტყუნებელი განაჩენებით დასრულდა, პოლიციას სავარაუდო ძალადობის ფაქტებზე პასუხისმგებლობა არ დაჰკისრებია. ის ეყრდნობა საქართველოს სახალხო დამცველის დასკვნებს, რომლებიც ადასტურებს მომიტინგეების მიმართ არასათანადო მოპყრობის მრავალრიცხოვან ბრალდებებს, მათ შორის წამებისა და ქალი მომიტინგეების მიმართ სექსუალური ძალადობის სავარაუდო მუქარის შესახებ ცნობებს.

კომისარი ხაზს უსვამს, რომ ქიმიური გამღიზიანებლების შემცველი წყლის ჭავლის გამოყენება სრულად უნდა იქნას შესწავლილი, რადგან ეს სერიოზულ კითხვებს ბადებს ძალის გამოყენების კანონიერებასთან, აუცილებლობასთან და პროპორციულობასთან დაკავშირებით, განსაკუთრებით იმის გათვალისწინებით, რომ ოფიციალური აღიარება იყო იმისა, რომ საპროტესტო აქციების დროს წყლის ჭავლებში ქიმიური ნივთიერებები იყო შერეული.

ადამიანის უფლებათა ევროპული სასამართლოს საქართველოზე პრეცედენტული პრაქტიკის გათვალისწინებით, იგი მოუწოდებს სწრაფ, საფუძვლიან, დამოუკიდებელ და ეფექტურ გამოძიებას, მოითხოვს პასუხისმგებლობის აღებას მომიტინგეების წინააღმდეგ ჩადენილი ნებისმიერი ადამიანის უფლებების დარღვევისთვის და ითხოვს განახლებულ ინფორმაციას მიღებული ზომების შესახებ", — ნათქვამია გავრცელებულ ინფორმაციაში.