სახელმწიფო უსაფრთხოების სამსახური განცხადებას ავრცელებს, სადაც წერს, რომ "არც საქართველოს და არც ისრაელის სპეცსამსახურებს არანაირი ინფორმაცია საქართველოში მოსალოდნელი ტერორისტული თავდასხმების საფრთხის შესახებ არ ჰქონიათ და შესაბამისად, არც არავისთვის გაუზიარებიათ".

"ჩვენ კავშირზე ვართ ისრაელის სპეცსამსახურის წარმომადგენლებთან, რომლებმაც გაკვირვება გამოთქვეს გავრცელებული არასწორი ინფორმაციის გამო.

ძალიან სამწუხარო და ნიშანდობლივია, რომ ასეთი ინფორმაცია ქართული მედიის ნაწილის მიერ ჩვენთან გადამოწმების გარეშე ვრცელდება.

კატეგორიულად მოვუწოდებთ ყველას, თავი შეიკავონ საქართველოსთვის დამაზიანებელი და გადაუმოწმებელი ინფორმაციის გავრცელებისგან", — წერია განცხადებაში.

ცნობისათვის, გუშინ ისრაელურმა მედიამ გაავრცელა ინფორმაცია იმის შესახებ, რომ ქნესეთის წევრებმა, რომლებიც 14-15 დეკემბერს საქართველოში "ისრაელის კვირის" კონფერენციაზე დასასწრებად უნდა ჩამოსულიყვნენ, უსაფრთხოების დირექტივა მიიღეს, რომ პოტენციური ტერორისტული ტერაქტის საფრთხის გამო ღონისძიებაში მონაწილეობა არ მიეღოთ.