ორშაბათს, 10 ნოემბერს, პარიზის სააპელაციო სასამართლომ საფრანგეთის ყოფილი პრეზიდენტი ნიკოლა სარკოზი ციხიდან გაათავისუფლა და მისი სასამართლო ზედამხედველობის ქვეშ მოთავსება გადაწყვიტა, — ამის შესახებ BFM TV იტყობინება. ამგვარად, სასამართლომ დააკმაყოფილა პროკურორის მოთხოვნა, რომელიც 70 წლის სარკოზის ადვოკატებმა შეიტანეს. საფრანგეთის ყოფილი პრეზიდენტი ციხეში თითქმის სამი კვირის განმავლობაში იმყოფებოდა.

ციხიდან გათავისუფლების შემდეგ, ყოფილ პრეზიდენტს, რომელიც საარჩევნო კამპანიის უკანონოდ დაფინანსებაშია მსჯავრდებული, ელექტრონული სამაჯურის ტარება დაევალა. ამას გარდა, მას ეკრძალება ბრალდებულებთან და მის საქმეში მოწმეებთან დაკავშირება.

ციხიდან გათავისუფლების შემდეგ, ნიკოლა სარკოზიმ პატიმრობას "ძალიან რთული" და "დამქანცველი" უწოდა.

ნიკოლა სარკოზიმ, რომელსაც სექტემბრის ბოლოს 5 წლით თავისუფლების აღკვეთა მიესაჯა, სასჯელის მოხდა 21 ოქტომბერს პარიზის სანტეს ციხეში დაიწყო. ის 9 კვადრატული მეტრის სამარტოო საკანში მოათავსეს. კვირაში სამჯერ ვიზიტების და მობილური ტელეფონით სარგებლობის უფლებაც მისცეს.

სარკოზი ომისშემდგომ პერიოდის პირველი ფრანგი ლიდერი და ევროკავშირის წევრი სახელმწიფოს პირველი ყოფილი პრეზიდენტი გახდა, რომელიც დააპატიმრეს.

მანამდე, პარიზის სასამართლომ საფრანგეთის ყოფილი პრეზიდენტი დამნაშავედ ცნო 2007 წლის საარჩევნო კამპანიის დროს ლიბიის მხრიდან უკანონო დაფინანსებასთან დაკავშირებულ საქმეში. საფრანგეთის პროკურატურის ცნობით, ლიბიის ყოფილმა დიქტატორმა მუამარ კადაფიმ სარკოზის 2007 წლის საარჩევნო კამპანიისას დაახლოებით 50 მილიონი ევრო შესწირა. თუმცა, სარკოზი ყველა სხვა ბრალდებაში — სახელმწიფო სახსრების მითვისებაში, პასიური კორუფციასა და საარჩევნო კამპანიის დაფინანსების დარღვევებში — გაამართლეს.

საფრანგეთის ხელისუფლებამ სარკოზის ჩამოართვა საპატიო ლეგიონისა და დამსახურების ორდენი, რაც 1945 წლის შემდეგ პირველი ასეთი შემთხვევაა.