საფრანგეთის ყოფილი პრეზიდენტი, ნიკოლა სარკოზი დააპატიმრეს. სასამართლომ ე.წ. "ლიბიის საქმეში" სარკოზი დამნაშავეს ცნო და 5 წლით თავისუფლების აღკვეთა მიუსაჯა. სარკოზი რეზიდენციიდან მეუღლესთან, მომღერალ კარლა ბრუნთან ერთად გამოვიდა და ქუჩაში შეკრებილ მხარდამჭერებს მიესალმა, რომლებიც სკანდირებდნენ — "ნიკოლას!"

სამთვიანი სასამართლო პროცესზე პროკურორმა განაცხადა, რომ სარკოზიმ "კორუფციული გარიგება დადო ბოლო 30 წლის ერთ-ერთ ყველაზე სასტიკ დიქტატორ", მუამარ კადაფისთან, რათა მისგან საარჩევნო კამპანიის დაფინანსება მიეღო.

სარკოზი დამნაშავედ ცნეს — კორუფციის, ლიბიის სახელმწიფო სახსრების განკარგვის ბოროტად გამოყენებისა და უკანონო საარჩევნო დაფინანსების ბრალდებებით.

სასამართლო პროცესზე სარკოზიმ უარყო დანაშაულში მონაწილეობის ფაქტი და განაცხადა, რომ იგი არ ყოფილა ჩართული კრიმინალურ შეთქმულებაში ლიბიისგან ფინანსური დახმარების მოსაპოვებლად. მან განაჩენი გაასაჩივრა და ახალი პროცესი ექვს თვეშია დაგეგმილი. თუმცა, მისი სასჯელის ხასიათიდან გამომდინარე, სარკოზიმ უნდა დაიწყოს სასჯელის მოხდა სანამ აპელაციის პროცესი მიმდინარეობს.

სარკოზიმ "ლე ფიგაროსთან" საუბრისას განაცხადა, რომ ციხეში წასაღებად მოამზადა ოჯახის ფოტოები და სამი წიგნი — მათ შორის იესოს ბიოგრაფია და "გრაფ მონტე-კრისტო", რომანი უდანაშაულო კაცზე, რომელსაც ციხე უსამართლოდ მიუსაჯეს და შემდეგ შურის საძიებლად ციხიდან გაიქცა. მან აღნიშნა, რომ პატიმრობის დროს წიგნს დაწერს.

Guardian-ის ინფორმაციით, მოსალოდნელია, რომ უსაფრთხოების მიზნით სარკოზი იზოლირებულად მოათავსონ — დაახლოებით 9 კვადრატული მეტრის ზომის სამარტოო საკანში, რომელსაც ექნება საკუთარი საშხაპე და საპირფარეშო. მას არ ექნება მობილური ტელეფონი, მაგრამ ექნება პატარა ტელევიზორი. ციხის ტელეფონით შეძლებს იურისტებთან და ოჯახის წევრებთან დაკავშირებას. ოჯახის წევრებს კვირაში ორჯერ შეეძლებათ მისი მონახულება. სარკოზიმ თქვა, რომ მას ურჩიეს ყურსასმენები წაეღო. "ღამით ბევრი ხმაური ისმის — ყვირილი, კივილი" — აღნიშნა მან.

სარკოზი გახდა პირველი ფრანგი ლიდერი, რომელიც ციხეში მოხვდა მეორე მსოფლიო ომის, ფილიპ პეტენის შემდეგ, რომელიც ნაცისტურ რეჟიმთან თანამშრომლობისთვის გაასამართლეს და ომის შემდეგ დააპატიმრეს.