საზოგადოებრივ-ლიტერატურული ჟურნალი არილი, რომელსაც გასულ წელს კულტურის სამინისტრომ დაფინანსება შეუწყვიტა, დონორების მხარდაჭერით სარგებლობასაც ვერ ახერხებს. მიზეზი ქართული ოცნების ხელისუფლების მიერ ინიციირებული და მიღებული "რუსული კანონია". არილის რედაქტორის, ლექსო დორეულის თქმით, ჟურნალის თემატური ნომრის დაფინანსების სურვილი ნორვეგიულმა ფონდმა გამოთქვა, მაგრამ ისინი ამ შესაძლებლობით ვერ ისარგებლებენ.

"ახლა მოგვწერეს, რომ ნორვეგიულ ფონდს სურს, დააფინანსოს არილის ნომერი, რომელიც მთლიანად მიეძღვნება ნორვეგიულ ლიტერატურას", — წერს ჟურნალის რედაქტორი, — "ეს დიდი ხნის ოცნება იყო ჩემი და მახოსი [მალხაზ ხარბედია, არილის ყოფილი რედაქტორი, რომელიც რამდენიმე თვის წინ გარდაიცვალა]: ნორვეგიული და ირლანდიური ნომრები. მაგრამ რა ვქნათ? გვიწევს უარი ვთქვათ ამ შესაძლებლობაზე, თორემ ეგრევე აგენტებად გამოგვაცხადებს ქართული ოცნება.

"ასეთი ქვეყანა გვაქვს: ჰამსუნზე, იბსენსა და ლარს სობი ქრისტიანსენზე წერის გამო, აგენტად გამოგაცხადებენ. დაფინანსება შეუწყვიტეს ლიტერატურულ გამოცემას და იმის გასაქანიც არ გვაქვს, რომ თავად ვეძიოთ წყაროები. ასე ახრჩობენ კულტურას და, ზოგადად, ყველაფერს".

აღსანიშნავია, რომ წლების განმავლობაში არილის რამდენიმე ნომერი სწორედ სხვადასხვა ქვეყნის საელჩოებთან და ფონდებთან თანამშრომლობით გამოიცა და თემატურად დაეთმო მათ ლიტერატურას.

"მას შემდეგ, რაც სამინისტრომ დაფინანსება შეგვიწყვიტა, კიდევ უფრო გავაქტიურდით ამ მიმართულებით, რომ ჩვენი მკითხველებისთვის, რომლებიც არილს დონაციებით აცოცხლებენ, დროდადრო ამოსუნთქვის შესაძლებლობა მიგვეცა", — აღნიშნავს დორეული.

არილს, რომელიც 1994 წლიდან გამოდის, შარშან, გამოცემის 30-ე საიუბილეო წელს, კულტურის სამინისტრომ დაფინანსება შეუწყვიტა. რედაქციის ცნობით, გადაწყვეტილების მიზეზი ჟურნალის "კრიტიკული პოზიცია" გახდა.

"არილისთვის დაფინანსების შეწყვეტა, ცხადია, კავშირშია ქვეყანაში მიმდინარე პოლიტიკურ პროცესებთან და ლოგიკური გაგრძელებაა ხელისუფლების მიერ წამოწყებული ანტიდასავლური პროპაგანდისა", — წერდა მაშინ ჟურნალი, რომელსაც ქართულ ლიტერატურაში შეტანილი განსაკუთრებული წვლილისთვის პრემია საბა აქვს მიღებული, — "არილი იყო და არის ლიტერატურასა და, ზოგადად, ხელოვნებაში დასავლური ღირებულებების, თავისუფლების ერთ-ერთი მთავარი რეპრეზენტატორი და ხმა".

ამჟამად, ჟურნალის რედაქცია ახალ ნომერზე მუშაობს, რომელიც მთლიანად მიეძღვნება მალხაზ ხარბედიას.

ასევე იხილეთ: