"ეს ომი მხოლოდ პოლიტიკური განცხადებებით არ დასრულდება, საჭიროა რეალური ნაბიჯები. ჩვენ ველით მოქმედებას აშშ-სგან, ევროპისა და მთელი მსოფლიოსგან" — ამის შესახებ უკრაინის პრეზიდენტი ვოლოდიმირ ზელენსკი სოციალურ ქსელ X-ზე წერს და აღნიშნავს, რომ "მოსკოვმა ლიდერთა დონის შეხვედრის მოსამზადებლად გამოყოფილი დრო ახალი მასიური თავდასხმების ორგანიზებისთვის გამოიყენა".

უკრაინის პრეზიდენტის ცნობით, რუსულმა ძალებმა უკრაინის მიმართულებით 540-მდე დრონი, 8 ბალისტიკური რაკეტა და 37 სხვა ტიპის რაკეტა გაუშვა.

"ზაპოროჟიეში, ხუთსართულიან საცხოვრებელ შენობაზე რუსული დარტყმის ადგილზე ყველა სასწრაფო დახმარების სამსახურია მობილიზებული. სამწუხაროდ, ამ დროისთვის დადასტურებულია ერთი ადამიანის გარდაცვალება და ათობით დაშავებულია, მათ შორის ბავშვები. ისევ და ისევ, ეს ჩვეულებრივი საცხოვრებელი კორპუსი იყო. ღამით საჰაერო თავდაცვის ძალები და სასწრაფო დახმარების სამსახურები სხვა რეგიონებშიც მოქმედებდნენ. თავდასხმის შედეგად დაზარალდა ვოლინის, დნეპრის, დონეცკის, ჟიტომირის, ზაპოროჟიეს, ივანო-ფრანკოვსკის, კიევის, როვნოს, სუმის, ხარკოვის, ხმელნიცკის, ჩერკასის, ჩერნოვცის და ჩერნიგოვის რეგიონები. ყველაზე მეტად სამოქალაქო ინფრასტრუქტურა — სახლები და ბიზნესები დაზარალდა. რუსებმა მშვიდობიანი მოსახლეობის წინააღმდეგ თითქმის 540 დრონი, 8 ბალისტიკური რაკეტა და 37 სხვა ტიპის რაკეტა გაუშვეს.

ჩვენ ვნახეთ მსოფლიოს რეაქცია წინა დარტყმაზე. თუმცა, ახლა, როდესაც რუსეთი კიდევ ერთხელ აჩვენებს სიტყვებისადმი სრულ უგულებელყოფას, ჩვენ რეალურ ქმედებებზე ვართ ორიენტირებული. აბსოლუტურად ნათელია, რომ მოსკოვმა ლიდერების დონის შეხვედრის მოსამზადებლად განკუთვნილი დრო ახალი მასშტაბური თავდასხმების ორგანიზებისთვის გამოიყენა. დიპლომატიისთვის შესაძლებლობების ფანჯრის ხელახლა გახსნის ერთადერთი გზაა მკაცრი ზომების მიღება ყველა იმ პირის წინააღმდეგ, ვინც აფინანსებს რუსეთის არმიას და ეფექტური სანქციები თავად მოსკოვის წინააღმდეგ — საბანკო და ენერგეტიკული სანქციები. ეს ომი მხოლოდ პოლიტიკური განცხადებებით არ დასრულდება, საჭიროა რეალური ნაბიჯები. ჩვენ ველით მოქმედებას აშშ-სგან, ევროპისა და მთელი მსოფლიოსგან," — წერს ვოლოდიმირ ზელენსკი.