საქართველოს მეხუთე პრეზიდენტი სალომე ზურაბიშვილი სინდისის პატიმრების, თბილისის საქალაქო სასამართლოში საბა სხვიტარიძის, მსახიობ ანდრო ჭიჭინაძის, იუმორისტ ონისე ცხადაძის და კიდევ 9 პირის სასამართლო პროცესზე მივიდა. თავდაპირველად მას სასამართლოს შენობაში შესვლის უფლებას არ აძლევდნენ. მიზეზად პირადობის დამადასტურებელი მოწმობის არ ქონა დასახელდა. სალომე ზურაბიშვილს მხოლოდ ონლაინ დოკუმენტი ჰქონდა, რომლით შესვლაზე მას უარი განუცხადეს.

მანდატურებმა ზურაბიშვილს უთხრეს, რომ დარბაზში მას შემდეგ დაუშვებდნენ, რაც მოსამართლე ნებართვას გასცემდა, თუმცა ნინო გალუსტაშვილმა სალომე ზურაბიშვილი პროცესზე არ დაუშვა.

მოგვიანებით, მას შემდეგ, რაც სალომე ზურაბიშვილმა პირადობის მოწმობა მიიტანა, ის სასამართლოში შეუშვეს

მანამდე, საქართველოს მე-5 პრეზიდენტმა ჟურნალისტებთან საუბრისას აღნიშნა, რომ არ არსებობს სასამართლოს იმედი, თუმცა ცალკეული მოსამართლეების იმედი მაინც რჩება.

"სასამართლომ რაც გვაჩვენა, ყველას გვაჩვენა და ყველამ ვიცით. გუშინ დავწერე, რომ ჩვენი კონსტიტუცია უკვე აღარ არსებობს და მათ შორის, სასამართლო და სხვა ინსტიტუტები, ასევე მათი დამოუკიდებლობა — ყველაფერი არის დღეს ფეხქვეშ გათელილი. ვიცით რა არის სასამართლო, თუმცა სანამ განაჩენი გამოცხადდება, ადამიანს ყოველთვის უნდა დაუტოვო შანსი, რომ თვითონ აიღოს თავისი პასუხისმგებლობა — თავისი სინდისი აალაპარაკოს, ამიტომ არ მიყვარს — წინასწარ ვთქვათ, რომ რომელიმე მოსამართლის იმედი არ გვაქვს. სასამართლოსი არ გვაქვს, მაგრამ მოსამართლის, როგორც ადამიანის, თავისუფალის და პასუხისმგებლიანის მაინც გვქონდეს," — განაცხადა სალომე ზურაბიშვილმა.