22 აგვისტოს დილით, უკრაინამ იერიში მიიტანა ბრიანსკის ოლქში მდებარე ნავთობსატუმბ სადგურ უნეჩაზე, რომელიც უკრაინული გამოცემების ცნობით, "დრუჟბას" მილსადენთანაა დაკავშირებული. მომხდარს უნგრეთის საგარეო საქმეთა მინისტრი პიტერ სიიარტო გამოეხმაურა.

მინისტრის თქმით, რუსეთისა და ბელარუსის საზღვართან "დრუჟბას" ნავთობის მილსადენზე თავდასხმის გამო, უნგრეთს ნავთობის მიწოდება შეუჩერდა, რაც უნგრეთის ომში ჩათრევის კიდევ ერთი მცდელობა იყო.

მოგვიანებით უნგრეთის პრემიერმინისტრმა, ვიქტორ ორბანმა "დრუჟბის" მილსადენის დაზიანების გამო, აშშ-ის პრეზიდენტს, დონალდ ტრამპს წერილი მისწერა.

უკრაინის პრეზიდენტმა, ვოლოდიმირ ზელენსკიმ ჟურნალისტის კითხვაზე — იქონია თუ არა ევროკავშირში უკრაინის გაწევრიანებაზე უნგრეთის ვეტოზე რუსეთში მილსადენ "დრუჟბაზე" უკრაინის მიერ მიტანილმა იერიშებმა გავლენა, განაცხადა, რომ "ყოველთვის უჭერდნენ მხარს უკრაინასა და უნგრეთს შორის მეგობრობას, ახლა ამ მეგობრობის არსებობა უნგრეთის პოზიციაზეა დამოკიდებული".

სიიარტომ ზელენსკის ამ განცხადებას 24 აგვისტოს, უკრაინის დამოუკიდებლობის დღეს უპასუხა. მან X-ზე დაწერა, რომ "ვოლოდიმირ ზელენსკიმ უკრაინის ეროვნულ დღესასწაული უნგრეთის დასაშინებლად გამოიყენა" და მოუწოდა უკრაინის პრეზიდენტს, "შეწყვიტოს უნგრეთისთვის მუქარა და თავდასხმები [უნგრეთის] ენერგეტიკულ უსაფრთხოებაზე".

"ვოლოდიმირ ზელენსკიმ უკრაინის ეროვნულ დღესასწაული უნგრეთის დასაშინებლად გამოიყენა. ჩვენ მკაცრად უარვყოფთ უკრაინის პრეზიდენტის დაშინებას.

ჩვენ სუვერენიტეტსა და ტერიტორიულ მთლიანობას ვცნობთ, როგორც საერთაშორისო პოლიტიკის ფუნდამენტურ ღირებულებებს. სწორედ ამიტომ ვცემთ პატივს თითოეული ქვეყნის სუვერენიტეტსა და ტერიტორიულ მთლიანობას და იმავეს მოვითხოვთ საპასუხოდ.

ბოლო დღეებში უკრაინამ სერიოზული თავდასხმები განახორციელა ჩვენი ენერგომომარაგების წინააღმდეგ. ენერგეტიკულ უსაფრთხოებაზე თავდასხმა სუვერენიტეტზე თავდასხმას ნიშნავს.

ომი, რომელიც უნგრეთი არ უკავშირდება, ვერასოდეს გაამართლებს ჩვენი სუვერენიტეტის დარღვევას.

მოვუწოდებთ ვოლოდიმირ ზელენსკის, შეწყვიტოს უნგრეთისთვის მუქარა და დაუსრულებელი თავდასხმები ჩვენს ენერგეტიკულ უსაფრთხოებაზე!" — დაწერა პიტერ სიიარტომ.

უნგრეთის საგარეო საქმეთა მინისტრის ამ განცხადებას მალევე გამოეხმაურა უკრაინის საგარეო საქმეთა მინისტრი ანდრეი სიბიგა, რომელმაც აღნიშნა, რომ უკრაინის პრეზიდენტს არ სჭირდება მითითებები "რა უნდა გააკეთოს ან რა რადის თქვას".

"არ არის საჭირო უკრაინის პრეზიდენტს უთხრათ, რა უნდა გააკეთოს ან რა როდის თქვას. ის უკრაინის პრეზიდენტია და არა უნგრეთის.

უნგრეთის ენერგეტიკული უსაფრთხოება თავად თქვენ ხელშია. განახორციელეთ დივერსიფიკაცია და გახდით დამოუკიდებელი რუსეთისგან, როგორც დანარჩენი ევროპა", —დააწერა სიბიგამ.

სიბიგას ამ განცხადებას სიიარტომ X-ზე უპასუხა და აღნიშნა, რომ უკრაინამ უნგრეთის ენერგეტიკულ უსაფრთხოებაზე თავდასხმა უნდა შეწყვიტოს.

"შეწყვიტეთ ჩვენს ენერგეტიკულ უსაფრთხოებაზე თავდასხმები! ეს ჩვენი ომი არ არის!" — დაწერა უნგრეთის საგარეო საქმეთა მინისტრმა.