სომხეთის პრემიერმინისტრმა, ნიკოლ ფაშინიანმა ოცნების პრემიერმინისტრს, ირაკლი კობახიძეს, 8 აგვისტოს ვაშინგტონში გამართული მოლაპარაკებების შედეგები სატელეფონო საუბრისას გააცნო. ამის შესახებ სომხური მედია სომხეთის მინისტრთა კაბინეტის პრესსამსახურზე დაყრდნობით იტყობინება.

სატელეფონო საუბრის დროს ფაშინიანმა კობახიძეს გააცნო: ერევანსა და ბაქოს შორის სამშვიდობო შეთანხმების დეტალები, მხარეთა ერთობლივი განცხადება ეუთოს მინსკის ჯგუფის დაშლის, რეგიონული კომუნიკაციების განბლოკვის, ასევე საერთაშორისო მშვიდობისა და კეთილდღეობის ტრამპის მარშრუტის პროექტის შესახებ. მხარეებმა ასევე განაცხადეს, რომ სომხეთსა და აზერბაიჯანს შორის მშვიდობა ახალ შესაძლებლობებს ხსნის მთელი სამხრეთ კავკასიის რეგიონისთვის. აღნიშნულია, რომ ფაშინიანმა მადლობა გადაუხადა კობახიძეს ვაშინგტონში მიღწეული შეთანხმებების დადებითად მისალმებისთვის.

მხარეებმა ასევე განიხილეს ორმხრივი და რეგიონული ურთიერთობების დღის წესრიგი.

8 აგვისტოს, ვაშინგტონში, სომხეთისა და აზერბაიჯანის ლიდერებმა, აშშ-ის შუამავლობით, ხელი მოაწერეს დეკლარაციას, რომელიც ითვალისწინებს TRIPP-ის (საერთაშორისო მშვიდობისა და კეთილდღეობის ტრამპის მარშრუტი) სატრანსპორტო მარშრუტის შექმნას. მარშრუტი აზერბაიჯანს სამხრეთ სომხეთის გავლით ნახიჩევანთან დააკავშირებს და მას ამერიკული კონსორციუმი მართავს.