შსს-ს განსაკუთრებულ დავალებათა დეპარტამენტის უფროსის მოადგილემ, მილერი ლაგაზაურმა თანამდებობა დატოვა. ამის შესახებ ინფორმაცია თავდაპირველად ტვ პირველმა გაავრცელა.

შემდეგ კი "ნეტგაზეთს" შინაგანს საქმეთა სამინისტროში უთხრეს, რომ მან სამსახური "პირადი განცხადების საფუძველზე" მიიღო.

6 ივლისს ცნობილი გახდა, რომ განსაკუთრებულ დავალებათა დეპარტამენტი (გდდ) კიდევ ორმა მაღალჩინოსანმა დატოვა. ესენი არიან: გდდ-ს ყოფილი უფროსის, ზვიად ხარაზიშვილი მოადგილე მირზა კეზევაძესა და დეპარტამენტის კიდევ ერთ მაღალჩინოსანი იოსებ მარგველაშვილი

6 ივლისს ოცნების ხელისუფლების შინაგან საქმეთა მინისტრის სანქცირებულმა მოადგილემ, ალექსანდრე დარახველიძემ დაადასტურა, რომ სპეციალურ დავალებათა დეპარტამენტის ყოფილი ხელმძღვანელის, სანქცირებული ზვიად ხარაზიშვილის მოადგილემ, ასევე სანქცირებულმა მირზა კეზევაძემ თანამდებობა საკუთარი სურვილით დატოვა.

მისივე თქმით, მირზა კეზევაძე "არავის გაუშვია სამსახურიდან".

"ბატონი მირზა კეზევაძე არავის გაუშვია სამსახურიდან. მან საკუთარი სურვილით მიმართა მინისტრს და ის წავიდა სამსახურიდან. არანაირ გაშვებას არ ჰქონია ადგილი, საკუთარი სურვილით დატოვა შინაგან საქმეთა სამინისტროს რიგები", — აღნიშნა დარახველიძემ.

იოსებ მარგველაშვილის შესახებ დასმულ კითხვას დარახველიძემ მოკლე პასუხი გასცა:

"იგივე. მანაც საკუთარი სურვილით დატოვა შინაგან საქმეთა სამინისტროს რიგები".

ცნობისათვის, მირზა კეზევაძე აშშ-ის, დიდი ბრიტანეთის, გერმანიის, ჩეხეთისა და ბალტიისპირეთის ქვეყნების მიერაა სანქცირებული. ის შეერთებულმა შტატებმა მაგნიტსკის სიაშიც შეიყვანა.

ბრიტანეთის მთავრობა მიუთითებდა, რომ კეზევაძე "არის ან/და პასუხისმგებელი იყო ისეთ საქმიანობაზე, რომელიც წარმოადგენს სერიოზულ დარღვევას ადამიანის უფლებისა, არ დაექვემდებაროს სასტიკ, არაადამიანურ ან ღირსების შემლახველ მოპყრობას ან დასჯას".

რაც შეეხება განსაკუთრებულ დავალებათა დეპარტამენტის დირექტორს, სანქცირებულ ზვიად ხარაზიშვილს, მან თანამდებობა 10 ივნისს დატოვა. ოცნების ხელისუფლების შსს-ს ცნობით, მის ადგილს უწყებაში რომან ქარცივაძე დაიკავებს.

"შინაგან საქმეთა სამინისტროში კიდევ ერთი ცვლილება განსაკუთრებულ დავალებათა დეპარტამენტს შეეხო — აღნიშნული დეპარტამენტის დირექტორის თანამდებობაზე რომან ქარცივაძე დაინიშნა," — ვკითხულობთ უწყების განცხადებაში.

შეგახსენებთ, რომ მიმდინარე წლის 30 იანვარს ოცნების მიერ არჩეულმა პრეზიდენტმა, მიხეილ ყაველაშვილმა, "კანონიერებისა და მართლწესრიგის განმტკიცების საქმეში შეტანილი განსაკუთრებული წვლილისთვის" პოლიციის სანქცირებული მაღალჩინოსნები, მათ შორის — განსაკუთრებულ დავალებათა დეპარტამენტის დირექტორი ზვიად ხარაზიშვილი ("ხარება") და
ამავე დეპარტამენტის დირექტორის მოადგილეები — მილერი ლაგაზაური და მირზა კეზევაძე. დააჯილდოვა.