ოცნების პარლამენტის დროებით საგამოძიებო კომისიაზე დღეს, 30 ივნისს, ოპოზიციური პარტიების ლიდერები: ნიკა გვარამია, მამუკა ხაზარაძე, გიორგი ვაშაძე მეორედ დაიბარეს. რაკი ისინი საპატიმროში არიან, კომისიაზე ჩართვა ონლაინ-რეჟიმში შესთავაზეს. სამივე მათგანმა კომისიაში მონაწილეობაზე უარი თქვა, რის გამოც კომისიამ მიიღო გადაწყვეტილება, რომ სამივე მათგანის საქმეზე პროკურატურისათვის მეორედ მიემართა.

ოპოზიციის სამივე ლიდერი ოცნების პარლამენტის დროებით საგამოძიებო კომისიაზე გამოუცხადებლობის გამო დააკავეს. აღსანიშნავია, რომ მამუკა ხაზარაძემ და გიორგი ვაშაძეს კომისიაზე გამოუცხადებლობისთვის დაკისრებული 50-50 000 ლარიანი ჯარიმები გადახდილი აქვთ.

ნიკა გვარამია 2025 წლის 13 ივნისს თავად მივიდა რუსთავის პენიტენციურ დაწესებულებაში, სადაც ხელბორკილი დაადეს და საპატიმროში შეასახლეს. გვარამიას 7-თვიანი პატიმრობა აქვს მისჯილი.

რაც შეეხება მამუკა ხაზარაძეს ის ერთი კვირის წინ, 23 ივნისს დააკავეს. სასამართლომ მას 8 თვე თავისუფლების აღკვეთა მიუსაჯა.

მამუკა ხაზარაძის დაკავებიდან ერთი დღის შემდეგ, 24 ივნისს გიორგი ვაშაძეც დააკავეს. მასაც 8-თვით თავისუფლების აღკვეთა აქვს მისჯილი.

ამას გარდა, სამივე მათგანს 2-2 წლით სახელმწიფო თანამდებობის დაკავება ეკრძალებათ.

მოსამართლე ნინო გალუსტაშვილმა გიორგი ვაშაძეს, 50 00-ლარიანი გირაოს დათქმულ დროში გადახდის მიუხედავად, 7-თვიანი პატიმრობა შეუფარდა. სტრატეგია აღმაშენებლის ლიდერს 2 წლით თანამდებობის დაკავება აეკრძალა.

"პარლამენტის დროებითი საგამოძიებო კომისიის" დაბარების შემთხვევაში, სხდომაზე არმისვლა სისხლის სამართლის კოდექსის 349-ე მუხლით გათვალისწინებულ დანაშაულად ითვლება, რაც "საქართველოს პარლამენტის დროებითი საგამოძიებო კომისიის მოთხოვნის შეუსრულებლობას" გულისხმობს. ეს ქმედება ისჯება ჯარიმით, ან თავისუფლების აღკვეთით ვადით ერთ წლამდე, თანამდებობის დაკავების, ან საქმიანობის უფლების ჩამორთმევით ვადით სამ წლამდე.

ასევე იხილეთ: