შინაგან საქმეთა მინისტრის, გიორგი მღებრიშვილის ბრძანებით, 21 ოქტომბრის ადგილობრივი თვითმმართველობის არჩევნების უსაფრთხო და მშვიდ გარემოში ჩატარების უზრუნველსაყოფად, ქვეყნის ყველა რეგიონში პასუხისმგებელი ჯგუფები შეიქმნება.

უწყების ცნობით, პასუხისმგებელი ჯგუფები თავიანთ სამოქმედო ტერიტორიებზე უზრუნველყოფენ მოსალოდნელი საფრთხეების გამომწვევი მიზეზების გამოვლენისა და რისკების შეფასებისათვის ღონისძიებების დაგეგმვასა და ჩატარების ორგანიზებას.

შსს-ს ინფორმაციით, წელს პირველად პასუხისმგებელი ჯგუფები პოლიციის შესახებ საქართველოს კანონით გათვალისწინებულ შესაბამის პრევენციულ საპოლიციო ღონისძიებებს განახორციელებენ, თუ მოსალოდნელია ძალადობა ან საზოგადოებრივი უსაფრთხოებისა და წესრიგის დარღვევა, რაც საფრთხეს უქმნის წინასაარჩევნო აგიტაციის პროცესს.

არჩევნების დღეს, 21 ოქტომბერს, პასუხისმგებელი ჯგუფები კენჭისყრის შენობის მიმდებარე ტერიტორიაზე ან საჭირო შემთხვევაში შენობაში პრევენციული და სამართალდარღვევაზე რეაგირების ღონისძიებების განხორციელებას უზრუნველყოფს.