ლოს-ანჯელესში იმიგრაციასთან დაკავშირებული პროტესტების ფონზე, სიტუაცია მნიშვნელოვნად გამწვავდა და სერიოზული პოლიტიკური და სამართლებრივი კრიზისის ნიშნები გამოიკვეთა.

DW-ს ცნობით, ეს კრიზისი ფედერალური ჯარის განთავსებაში, კალიფორნიის მიერ დონალდ ტრამპის ადმინისტრაციის წინააღმდეგ სარჩელის შეტანასა და საერთაშორისო თუ შიდა კრიტიკაში გამოიხატა. უკანასკნელი კვირის განმავლობაში დაძაბულობა გაიზარდა და ნათლად გამოჩნდა კონფლიქტი ფედერალურ მთავრობასა და კალიფორნიის შტატს შორის.

ყველაფერი პარასკევს, 6 ივნისს დაიწყო, როდესაც აშშ-ის იმიგრაციისა და საბაჟო აღსრულების სამსახურმა (ICE) ლოს-ანჯელესში ფართომასშტაბიანი რეიდები ჩაატარა. მექსიკის საგარეო საქმეთა მინისტრის, ხუან რამონ დე ლა ფუენტეს განცხადებით, სულ მცირე 42 მექსიკელი დააკავეს, უმეტესობა — სამუშაო ადგილზე. აღნიშნულმა ქმედებამ მძაფრი პროტესტი გამოიწვია მიგრანტთა თემებსა და სამოქალაქო აქტივისტებში.

პროტესტები მალევე დაიწყო — მოქალაქეები შეიკრიბნენ იმიგრაციისა და საბაჟო აღსრულების სამსახურის შენობებთან და გადაკეტეს რამდენიმე მნიშვნელოვანი გზა. ბევრ მათგანს მექსიკის დროშები და მიგრანტების ღირსების დამცველი პლაკატები ეჭირა. კვირისთვის, პროტესტები კიდევ უფრო გაფართოვდა. NBC News Radio-ს საინფორმაციო დირექტორმა ჯეისონ კამპადონიამ, რომელიც ადგილზე იმყოფებოდა, აღნიშნა, რომ დაძაბულობა აშკარა იყო და ბევრი ადარებდა ამ მოვლენებს 1992 წლის ლოს-ანჯელესის ამბოხს, რომელიც როდნი კინგის ცემის შემდეგ პოლიციელების გამართლებას მოჰყვა.

კვირა საღამოს ლოს-ანჯელესის პოლიციის უფროსმა ჯიმ მაკდონელმა განაცხადა, რომ მათი ოფიცრები ძალადობის სამიზნე გახდნენ და სიტუაცია "მძიმდებოდა". მან ასევე აღნიშნა, რომ შესაძლოა საჭირო გახდეს ჯარების ჩარევის საკითხის გადახედვა.

ამერიკის შეერთებული შტატების პრეზიდენტმა, დონალდ ტრამპმა ორშაბათ დილით Truth Social-ზე დაწერა, რომ აუცილებელია სამხედრო ძალის მობილიზება.

"არ მისცეთ უფლება ამ ბანდიტებს, რომ ეს შერჩეთ... გამოიყვანეთ ჯარი!! დააპატიმრეთ ყველა, ვისაც ნიღაბი უკეთია!" — განაცხადა მან.

მოგვიანებით ტრამპმა აღნიშნა, რომ ეროვნული გვარდიის გაგზავნის გადაწყვეტილება "საუკეთესო" იყო და რომ ამ ქმედებამ ლოს-ანჯელესი განადგურებას გადაარჩინა. მან ასევე დაცინვით მოიხსენია კალიფორნიის გუბერნატორი გევინ ნიუსომი და ლოს-ანჯელესის მერი კარენ ბასი და მათგან მადლიერება მოითხოვა.

ამავე დღეს, აშშ-ის ჩრდილოეთ სარდლობამ დაადასტურა, რომ ლოს-ანჯელესში დაახლოებით 700 საზღვაო ქვეითი გაიგზავნა ქალაქის უსაფრთხოების უზრუნველსაყოფად. ტრამპის ადმინისტრაციის მაღალჩინოსანმა AFP-ს განუცხადა, რომ ეს ნაბიჯი განპირობებული იყო ფედერალურ ოფიცრებსა და შენობებზე მზარდი მუქარებით. გარდა ამისა, ტრამპმა ბრძანა, რომ დამატებით 2 000 ეროვნული გვარდიის ჯარისკაცი გაეგზავნათ ქალაქში აშშ-ის იმიგრაციისა და საბაჟო აღსრულების სამსახურის მხარდაჭერის მიზნით.

კალიფორნიის გუბერნატორმა გევინ ნიუსომმა მწვავედ გააკრიტიკა სამხედრო ძალების განთავსება და მას "გაუმართლებელი, უსარგებლო და ჯარისკაცებისადმი უპატივცემულო" გადაწყვეტილება უწოდა.

მან აღნიშნა, რომ ჯერჯერობით მხოლოდ 300-მდე სამხედროა რეალურად ჩართული პროცესში, დანარჩენი კი ფედერალურ შენობებში ბრძანების გარეშე იმყოფება. ნიუსომმა საჯაროდ განაცხადა, რომ შტატი ტრამპის ადმინისტრაციას უჩივლებს, რაც მან ადმინისტრაციის გადაწყვეტილება შეაფასა როგორც არაკონსტიტუციური ქმედება. კალიფორნიის გენერალურმა პროკურორმა რობ ბონტამ დაადასტურა, რომ შტატი შეეცდება ჯარის განთავსება დროებითი შეაჩეროს "შეჩერების ბრძანების მეშვეობით".

საერთაშორისო რეაქცია ამ მოვლენებს მყისიერად მოჰყვა. გაერთიანებულმა ერებმა მხარეებს მოუწოდა, თავი შეიკავონ კონფლიქტის ესკალაციასა და წინააღმდეგობის მილიტარიზაციისგან. მექსიკის პრეზიდენტმა კლაუდია შაინბაუმმა დაგმო ძალადობა ლოს-ანჯელესში და მიგრანტების ღირსების პატივისცემისკენ მოუწოდა. მექსიკის მთავრობამ დაადასტურა, რომ დაკავებული თანამემამულეებისთვის იურიდიული დახმარება უკვე უზრუნველყოფილია.

ლოს-ანჯელესში პროტესტი უკვე მეოთხე დღეა გრძელდება. დემონსტრანტები კვლავ იკავებენ ცენტრალურ გზებს, რაც ზოგიერთ ქუჩაზე მოძრაობას აჩერებს. არეულობაა სან-ფრანცისკოშიც, სადაც აშშ-ის იმიგრაციისა და საბაჟო აღსრულების სამსახურის შენობასთან გამართული აქციის დროს სულ მცირე 60 ადამიანი დააკავეს, მათ შორის არასრულწლოვანებიც.

ქალაქი ელოდება მოვლენების შემდგომ განვითარებას, ხოლო ქვეყანა აკვირდება უკიდურესად დაძაბულ დაპირისპირებას ფედერალურ მთავრობასა და შტატის ხელისუფლებას შორის. ეს მოვლენები არა მხოლოდ ტრამპის საიმიგრაციო პოლიტიკისადმი მზარდ წინააღმდეგობის უსვამს ხაზს, არამედ ხელახლა აღვივებს დებატებს მილიტარიზაციის, სამოქალაქო თავისუფლებებისა და პრეზიდენტის ძალაუფლების კონსტიტუციური შეზღუდვების შესახებ.