ოცნების ხელისუფლების ეკონომიკისა და მდგრადი განვითარების მინისტრი ლევან დავითაშვილი კატარში იმყოფება. ვიზიტის ფარგლებში ის კატარის პრემიერმინისტრ შეიხ მოჰამედ ბინ აბდულრაჰმან ბინ ჯასიმ ალ-თანის შეხვდა. ინფორმაციას ოცნების ხელისუფლების ეკონომიკისა და მდგრადი განვითარების სამინისტრო ავრცელებს.

"ჩვენ გვქონდა ძალიან საინტერესო შეხვედრა კატარის პრემიერმინისტრთან - საუბარი შეეხო საინვესტიციო მიმართულებით თანამშრომლობას, ქვეყნებს შორის ტურისტული, სავაჭრო მიმართულებით თანამშრომლობის პერსპექტივებს. ზოგადად კატარი და მისი ხელისუფლება ძალიან დადებითად არის საქართველოს მიმართ განწყობილი. იმედი მაქვს, რომ მიმდინარე წლის განმავლობაში მაღალ დონეზე შედგება ორმხრივი ვიზიტები როგორც კატარიდან, ისე საქართველოდან და ეს კიდევ უფრო შეუწყობს ხელს ჩვენს ქვეყნებს სავაჭრო-ეკონომიკური ურთიერთობების გაღრმავებას", — განაცხადა ლევან დავითაშვილმა.

უწყების ცნობით, საქართველოს დელეგაცია კატარის მეხუთე ეკონომიკურ ფორუმში მონაწილეობს. ფორუმი ამირ შეიხ თამიმ ბინ ჰამად ალ-თანის პატრონაჟითა და Bloomberg-ის მხარდაჭერით იმართება და მასში 2500-ზე მეტი გლობალური ლიდერი მონაწილეობს როგორ ყურის ქვეყნებიდან, ისე მთელი მსოფლიოდან.

ვიზიტის ფარგლებში პირველმა ვიცე-პრემიერმა ასევე შეხვედრა გამართა საუდის არაბეთის სამეფოს ეკონომიკისა და დაგეგმვის მინისტრ ფაისალ ალ იბრაჰიმთან.

ვიზიტის ფარგლებში საქართველოს დელეგაცია ხვალ შეხვედრას გამართავს კატარის სახელმწიფოს ვაჭრობისა და მრეწველობის მინისტრ შეიხ ფეისალ ბინ თანი ალ თანისთან. შეხვედრისას დაგეგმილია მნიშვნელოვანი სავაჭრო-ეკონომიკური ურთიერთობების საკითხების განხილვა, მათ შორის საუბარი შეეხება საინვესტიციო, ენერგეტიკის, ტურიზმის, ტრანსპორტისა და კომუნიკაციების მიმართულებით თანამშრომლობას, — ნათქვამია გავრცელებულ ინფორმაციაში.