"უშუალოდ ამ პოლიტიკური შოუს ნაწილს რაც შეეხება, ეს არის გადმოგდებული "სატოპკე" ოპოზიციისთვის", — ოცნების დეპუტატი ლევან მაჭავარიანი MEGOBARI აქტის მიღებას ეხმაურება. მისი თქმით, "MEGOBARI აქტი" თუ იქნა "კანონად, ტრამპი ვალდებული იქნება, რომ ეს აღასრულოს".

"უშუალოდ ამ პოლიტიკური შოუს ნაწილს რაც შეეხება. რა თქმა უნდა, ეს არის გადმოგდებული "სატოპკე" ოპოზიციისთვის, ვინაიდან ოპოზიციის ამომრჩეველი ძირითადად უყურებს ოპოზიციურ არხებს და ეს მედია საშუალებები რა კომენტარიც მე გავაკეთე იმგვარად არ აშუქებენ ამას და ამბობენ, რომ ეს კანონპროექტი თუ იქცა კანონად, ტრამპი ვალდებული იქნება, რომ ეს აღასრულოს. არანაირად არ არის ტრამპი ამის აღსრულებაზე ვალდებული. კიდევ ერთხელ ვამბობ, ეს ყველაფერი ტრამპს რომ უნდოდეს, ამ კანონპროექტის გარეშეც მას სრული ლეგიტიმაცია აქვს, რომ გააკეთოს ასეთი ქმედებები", — თქვა მაჭავარიანმა.

მისივე თქმით, MEGOBARI აქტის მიღება "უბრალოდ პოლიტიკური შოუა".

"რაც შეეხება უშუალოდ ამ აქტს, რითაც სულდგმულობს ოპოზიცია. მძიმე მდგომარეობაში არიან და ზეიმობენ ხოლმე რაღაც ეტაპს რომ გაივლის ეს აქტი, ეს ზეიმი გრძელდება ერთი ორი დღე, მაგრამ საზოგადოებას მინდა განვუმარტო, რომ ეს არის უბრალოდ პოლიტიკური შოუ. რაც ამ "მეგობრულ აქტში", არადა რეალურად მტრულ აქტში, ვინაიდან იქ მეგობრული არაფერი წერია, სულ რომ ეს კანონპროექტი კანონად ვერც იქცეს ან იქცეს, იქ რაც არის ჩაწერილი, სანქციების ნაწილი და ა.შ. ეს ყველაფერი ბატონ ტრამპს შეუძლია აამოქმედოს დღესვე. შეეძლო აემოქმედებინა ერთი თვის წინ. შეუძლია აამოქმედოს ერთი თვის შემდეგ. აბსოლუტურად არანაირ კავშირში არ არის ეს კანონპროექტი კანონად იქცევა თუ არა, ტრამპის გადაწყვეტილებასთან", — აღნიშნა მაჭავარიანმა.

6 მაისს, წარმომადგენელთა პალატაში "MEGOBARI აქტს" მხარი 349 კონგრესმენმა დაუჭირა, რაც კანონპროექტის 80%-იანი მხარდაჭერაა.

წარმომადგენელთა პალატაში კენჭისყრას წინ უსწრებდა დებატები "MEGOBARI აქტის" შესახებ. სიტყვით გამოვიდა ხუთი კანონმდებელი, სამი რესპუბლიკელი და ორი დემოკრატი: რესპუბლიკელები — ბრაიან მასტი (პალატის საგარეო ურთიერთობათა კომიტეტის თავმჯდომარე), ჯო უილსონი და უორენ დევიდსონი და დემოკრატები ჯონი ოშესკი და სტივ კოენი. აქედან ოთხმა მხარი დაუჭირა MEGOBARI აქტის მიღებას, ერთი, რესპუბლიკელი უორენ დევიდსონი წინააღმდეგი იყო.

წარმომადგენელთა პალატის შემდეგ, სანამ კანონპროექტი ხელმოსაწერად პრეზიდენტ დონალდ ტრამპამდე მიაღწევს, ის სენატმაც უნდა დაამტკიცოს.