მე ვაპირებ ვიყო ყველას პრეზიდენტი, იმის მიუხედავად, ვის მოვწონვარ და ვის არა!, – ამის შესახებ ოცნების მიერ არჩეულმა პრეზიდენტმა მიხეილ ყაველაშვილმა პარლამენტში ოცნების ხელისუფლების მიერ ჩატარებულ ინაუგურაციაზე თქვა.

"ჩემთვის საქართველოს თითოეული მოქალაქე ძვირფასია, მათი შეხედულებებისა თუ პოლიტიკური კუთვნილების მიუხედავად. მე ვაპირებ ვიყო ყველას პრეზიდენტი, იმის მიუხედავად, ვის მოვწონვარ და ვის არა! ჩემი მომავალი ძალისხმევა მიმართული იქნება საზოგადოების კონსოლიდაციისა და გაერთიანებისკენ. მიუხედავად იმისა ვის რა შეხედულებები აქვს ამა თუ იმ საკითხზე - ჩვენ უნდა მოვახერხოთ გაერთიანება ჩვენი სამშობლოს, ღირებულებებისა და ურთიერთპატივისცემაზე დაფუძნებული წესების გარშემო. იმ მომავლის გარშემო, რომლის შენებაც ჩვენ ერთად უნდა განვაგრძოთ", — თქვა მიხეილ ყაველაშვილმა.

პარლამენტში ოცნების მიერ არჩეული პრეზიდენტის, მიხეილ ყაველაშვილის ინაუგურაცია დღეს გაიმართა. სალომე ზურაბიშვილმა ორბელიანების სასახლე დატოვა და თქვა, რომ 6 წლის წინ დადო ფიცი კონსტიტუციაზე, დადო ფიცი, რომ ემსახურებოდა ქვეყანას და ხალხს და ეს არ შეიცვლება იქნები სასახლეში, თუ სასახლის გარეთ.