ამერიკის შეერთებული შტატების ახლადარჩეული პრეზიდენტი, დონალდ ტრამპი, თავდაცვის მდივნად Fox News-ის წამყვანს, პიტ ჰეგსეთს დაასახელებს.

44 წლის ჰეგსეთი აშშ-ის არმიის ვეტერანია, რომელიც ერაყსა და ავღანეთში მსახურობდა. ამავდროულად, ის პრინსტონისა და ჰარვარდის უნივერსიტეტების კურსდამთავრებულია.

"პატივი მაქვს, ჩემს კაბინეტში თავდაცვის მდივნად პიტ ჰეგსეთი დავასახელო. პიტმა მთელი ცხოვრება ქვეყნისათვის ბრძოლაში გაატარა. ის მკაცრი, ჭკვიანი და ამერიკის პატრიოტი ადამიანია. შტურვალთან პიტის ყოფნის პირობებში, ამერიკის მტრები ყურადღებით იქნებიან — ჩვენი არმია კვლავ დიადი იქნება და ამერიკა უკან არასდროს დაიხევს", — განაცხადა დონალდ ტრამპმა.

ჰეგსეთი Fox News-ის წამყვანია. ასევე, ის ავტორია წიგნისა "ომი მეომრებთან: ღალატი კაცებისა, რომლებიც თავისუფლებას გვინარჩუნებენ".

ტრამპის გადაწყვეტილებას აზრთა სხვადასხვაობა მოჰყვა. ბევრი ფიქრობს, რომ ჰეგსეთს თავდაცვის მდივნობისთვის საკმარისი კომპეტენცია არ აქვს და ამან შეიძლება სენატის მიერ მისი კანდიდატურის დადასტურება გაართულოს.

"ჰეგსეთს შესანიშნავი ისტორია აქვს როგორც უმცროს ოფიცერს, თუმცა არ აქვს ეროვნული უსაფრთხოების უმაღლესი ოფიცრის გამოცდილება, რომელიც მდივანს სჭირდება", — განაცხადა მარკ კენსიანმა, სტრატეგიული და საერთაშორისო კვლევების ცენტრის უფროსმა მრჩეველმა.