პრემიერმინისტრი, ირაკლი კობახიძე, კოალიცია ცვლილებების ლიდერის, ნიკა გვარამიას განცხადებას მასტიგმატიზებელი კომენტარით გამოეხმაურა, სადაც მის ფსიქიკურ ჯანმრთელობაზე ისაუბრა.

გვარამია აცხადებდა, რომ მას ჰქონდა ფსიქიკური პრობლემები, თუმცა იმკურნალა და დაძლია - ირკვევა, რომ არავითარი პრობლემები არ მოუგვარებია, – განაცხადა პრემიერმა.

პარტია ახალის ლიდერი, ნიკა გვარამიას თქმით, ცესკო 26 ოქტომბრის საპარლამენტო არჩევნების შემაჯამებელი ოქმის გამოქვეყნებას დროზე ადრე გეგმავს, რათა ოპოზიციამ საკუთარი საპროტესტო გეგმა სრულად ვერ განახორციელოს.

"რაღაც ჩქარ-ჩქარა ფაციფუცობთ ცესკოდ წოდებულნო. ახლა, თქვენ თუ გგონიათ, რომ 21ის ნაცვლად 16 ნოემბერს თუ გამოგვიცხადებთ შემაჯამებელ ოქმს (ისტორიულ განაჩენს), მანამდე ვერ მოგისწრებთ ყველაფერს, რაც დაგეგმილი გვაქვს, ძალიან მიგიქარავთ. ფეხს ვერ გამოადგამთ მაგ თქვენი მცირე ქაჯეთის ციხიდან! და ის პატივცემული გვამები ფეხს ვერ შეადგამენ დიდ ქაჯეთის ციხეში.

p.s. შემთხვევით, ვინმემ ხომ არ დაიჯერა, რომ კარვებს და "კიდო იმგენს" აღარ ვიმარაგებთ? :)) ვიმარაგებთ, ვიმარაგებთ. და "კიდო იმგენი" ბევრად საინტერესო და მნიშვნელოვანია კარვებზე. ახლა რომ აქ არ მოგიყვებით, ხვდებით ალბათ. საჭირო დროს და საჭირო ადგილზე გაიგებთ, დაგველოდეთ", — წერს გვარამია სოციალურ ქსელში.

პრემიერის თქმით, საზოგადოების მხარდაჭერა არის ხელისუფლების, მმართველი გუნდის მხარეს და ოპოზიციის მხარეს არის საზოგადოების ნულოვანი მხარდაჭერა და მთავარი სწორედ ეს არის.

"მათ სცადეს ქუჩაში რაღაც წარმატების მიღწევა, თუმცა არჩევნებში წარმატებას და ქუჩაში წარმატებას სჭირდება ერთი და იგივე რესურსი, ეს არის საზოგადოების რესურსი, რაც მათ არ აქვთ. მთლიანად ოპოზიცია ცდილობს წავიდეს კონსტიტუციური წყობილების წინააღმდეგ, თუმცა ეს არის ძალიან უსუსური მცდელობა, მათ არა აქვთ არავითარი არგუმენტები არჩევნებთან დაკავშირებით. ხედავდით, რომ წინასაარჩევნო პერიოდი იყო უპრეცედენტოდ მშვიდი და საარჩევნო გარემო იყო კონკურენტული, ეს გარემო აბსოლუტურად თავისუფალი იყო. არჩევნების დღეს რაც შეეხება, არჩევნები ელექტრონული წესით ჩატარდა, ამომრჩეველთა 90 %-ზე მეტმა რეგისტრაცია გაიარა ელექტრონული წესით, ასევე ელექტრონული წესით ხდებოდა ხმის მიცემა და ხმების დათვლა მოხდა ელექტრონული წესით. ასეთ პირობებში დაუბალანსებელი ოქმებიც კი არ არსებობდა, რაც იყო 30- წლიანი პრობლემა. ასეთი ტიპის ხარვეზებიც კი არ ჰქონდა ამ არჩევნებს. რეალურად, საზოგადოების მხარდაჭერა მიიღო ქართულმა ოცნებამ, ყველაფერი დანარჩენი არის ცარიელი სპეკულაციები, რასაც არ აქვს არავითარი საფუძველი. ვერავითარი ფაქტი ვერ წარმოადგინეს/ ერთადერთი იყო მარნეულის ოლქში ბიულეტენების ჩაყრის შემთხვევა და იქაც რეაგირება იყო მყისიერი," — განაცხადა კობახიძემ.