დემოკრატიის კვლევის ცენტრი (DRC) განცხადებას ავრცელებს და საქართველოში ჩეხი ჟურნალისტის არ შემოშვების ფაქტს ეხმაურება,

"ჩეხი ჟურნალისტი, რეპორტიორი და ფოტოგრაფი, რეი ბეისლი რომელიც აქტიურად აშუქებდა საქართველოში რუსული კანონის წინააღმდეგ მიმდინარე საპროტესტო აქციებს, 22 ოქტომბერს საქართველოში არ შემოუშვეს. აღნიშნულ ფაქტზე ინფორმაცია ჟურნალისტმა თავად გამოაქვეყნა Twitter-ზე, სადაც აღნიშნა, რომ მისთვის არ განუმარტავთ საზღვრის კვეთის შეზღუდვის საფუძველი. დემოკრატიის კვლევის ცენტრის ინფორმაციით, ბოლო კონტაქტი ჟურნალისტს სტუდია მონიტორთან ჰქონდა. კერძოდ, მათ განუმარტა, რომ ტელეფონის ჩამორთმევას უპირებდნენ. ამის შემდგომ ჟურნალისტთან დაკავშირება ვერ მოხერხდა.

ბოლო ინფორმაციით, ჟურნალისტი საქართველოში იმყოფება და მისი ჩეხეთში გაბრუნება შაბათს, 26 ოქტომბერს იგეგმება. მას კვლავ შეზღუდული აქვს ტელეფონზე წვდომა.

საგულისხმოა, რომ შინაგან საქმეთა სამინისტროს, რომელიც საზღვრის კონტროლზე პასუხისმგებელი ორგანოა, ამ დრომდე აღნიშნულ ფაქტთან დაკავშირებით განცხადება არ გაუკეთებია.

დემოკრატიის კვლევის ცენტრი მოუწოდებს საქართველოს ხელისუფლებას და შინაგან საქმეთა სამინისტროს, დროული რეაგირება მოახდინონ ჟურნალისტის საზღვარზე არ შემოშვების ფაქტთან დაკავშირებით, ასევე მიაწოდონ დეტალური ინფორმაცია საზოგადოებას, თუ რის საფუძველზე შეეზღუდა მას ქვეყანაში შემოსვლა და ჟურნალისტური საქმიანობის განხორციელება", — ნათქვამია გავრცელებულ განცხადებაში.

ინფორმაცია ჩეხი ჟურნალისტის საქართველოში არ შემოშვების შესახებ სტუდია მონიტორმა გაავრცელა.

ჟურნალისტმა, რეი ბეისლიმ X-ზე დაწერა, რომ ის ყოველგვარი ახსნა-განმარტების გარეშე არ შემოუშვეს ქვეყანაში. ცნობისათვის, ის საქართველოში რამდენიმე თვის წინ იმყოფებოდა და აქტიურად აშუქებდა რუსული კანონის საწინააღმდეგო აქციებს.