ძალაუფლება ამ ქვეყანაში ეკუთვნის ქართველ ხალხს. ამიტომ, ჩვენ მიგვაჩნია, რომ ნებისმიერი კანდიდატურა თუ კანდიდატურები უნდა განიხილებოდეს არჩევნების შემდეგ, — ამის შესახებ კოალიცია ძლიერი საქართველოს ლიდერმა, მამუკა ხაზარაძემ კოალიციის ლიდერების პრეზიდენტთან გამართული შეხვედრის შემდეგ განაცხადა. მისი თქმით, შეხვედრაზე კანდიდატურებზე საუბარი არ ყოფილა, ახლა მთავარია, რომ "ქვეყანა დაუბრუნდეს ევროპულ კურსს".

"ძლიერი საქართველოს” პოზიცია არის ძალიან კონკრეტული: ძალაუფლება ამ ქვეყანაში ეკუთვნის ქართველ ხალხს. ამიტომ, ჩვენ მიგვაჩნია, რომ ნებისმიერი კანდიდატურა თუ კანდიდატურები უნდა განიხილებოდეს არჩევნების შემდეგ. ჩვენს ეს ძალიან მკაფიოდ დავაფიქსირეთ.

არანაირ კანდიდატურებზე საუბარი არ ყოფილა. ახლა მთავარია, რომ ჩვენ, ქართველ ხალხთან ერთად ფოკუსი მივმართოთ იმისკენ, რომ დამაჯერებლად გავიმარჯვოთ და ქვეყანა დავაბრუნოთ ევროპულ კურსზე.

რაც შეეხება კანდიდატებს, კანდიდატების განხილვა არ ყოფილა. ჩვენ ღრმად ვართ დარწმუნებულები, რომ ამ ქვეყანაში არჩევნები და მისი შედეგები ეკუთვნის ხალხს და ამ არჩევნების შედეგად უნდა მოხდეს ყველა დანარჩენი საკითხის განხილვა ქარტიის ფარგლებში.

ჩვენ არ ვთვლით, რომ პოლიტიკოსებმა უნდა გადაწყვიტონ არჩევნებამდე ამა თუ იმ თანამდებობის პირების დანიშვნა-არდანიშვნის საკითხი იმიტომ, რომ ძალაუფლება ყველა ნორმალურ ქვეყანაში, და ჩვენ ვადგავართ ნორმალური ქვეყნის მშენებლობას, ეკუთვნის ქართველ ხალხს!

ქართველი ხალხის არჩევანი არის უზენაესი! ჩვენ ჯერ უნდა დაველოდოთ 26 ოქტომბერს, გავიმარჯვოთ, გავაფორმოთ ეს გამარჯვება მშვიდობიანად და, შესაბამისად, ქარტიის ფარგლებში პრეზიდენტი, როგორც გარანტორი ამ ძალაუფლების გადაცემის და ახალი შემადგენლობის ჩამოყალიბების, იქნება მთავარი ფიგურა. ეს იქნება ოპოზიციური პარტიების და ქალბატონ სალომე ზურაბიშვილის ერთობლივი გადაწყვეტილება, ის ითამაშებს მთავარ როლს, როგორც წერია ქარტიაში. ეს არის ჩვენი პოზიცია და რაც მას გავუზიარეთ და ამ პოზიციას არ შევცვლით", — განაცხადა მამუკა ხაზარაძემ.