Dota 2 მსოფლიოში ერთ-ერთი ყველაზე პოპულარული ვიდეო თამაშია, რომელიც უმსხვილეს კომპანია Valve-ს ეკუთვნის. Dota 2 ე.წ. MOBA-ს ანუ მასობრივი ონლაინ საბრძოლო არენის ტიპის თამაშია.

თამაშში ერთმანეთს 5 მოთამაშისგან შემდგარი ორი გუნდი ეჯიბრება, რომელთა მიზანიც მოწინააღმდეგის ბაზის დანგრევაა. მოთამაშეებს 113 პერსონაჟიდან შეუძლიათ სასურველის ამორჩევა, თითოეულ მათგანს სპეციალური უნარები და მონაცემები აქვს. Dota 2-ში წარმატების მიღწევა დამოკიდებულია როგორც გუნდურ, ასევე ინდივიდუალურ ოსტატობაზე.

ეს თამაში უკვე წლებია რაც ელექტრონული სპორტის ერთ-ერთი ლიდერია. ტარდება უამრავი ჩემპიონატები, მათ შორის საქართველოშიც. უცხოურ Esport ბაზარზე დოტას ჩემპიონატებში ასტრონომიული თანხები თამაშდება. მაგალითად, 2017 წლის საერთაშორისო ჩემპიონატის გამარჯვებულმა გუნდმა Team Liquid-მა, პირველი ადგილის აღებასთან ერთად, პრიზად $10 700 000 მიიღო.

Dota 2-ის თამაში სავარჯიშოდ და დამწყები მოთამაშეებისთვის ბოტების ანუ შიდა ხელოვნური ინტელექტის წინააღმდეგაა რეკომენდებული. თუმცა, ისევე როგორც ყველა ვიდეო თამაშში, AI მაინცდამაინც დიდი ინტელექტით ვერ გამოირჩევა და გარკვეული პერიოდის შემდეგ მათი დამარცხება ადვილი ხდება. ცხადია, ბოტების წინააღმდეგ თამაში რადიკალურად განსხვავდება ადამიანების წინააღმდეგ თამაშისგან. ადამიანები ბევრად უფრო სპონტანურები არიან, ხშირად მიმართავენ რისკს და თამაში ბევრად უფრო საინტერესოა. შესაბამისად, დოტას მოთამაშეები ბოტებთან, როგორც წესი, გასართობადაც კი არ თამაშობენ.

თუმცა გამონაკლისია ილონ მასკის კომპანიის Open AI-ს მიერ შექმნილი დოტას მოთამაშე ბოტი, რომელმაც მსოფლიოში საუკეთესო მოთამაშე დაამარცხა. შეიძლება ითქვას, რომ ეს იმაზე მეტად კომპლექსური და მნიშვნელოვანი მოვლენაა, ვიდრე AI-ს მიერ მოჭადრაკეების დამარცხებაა. რადგან დოტა, ბევრად უფრო დინამიური თამაშია, რომელსაც გარდა სვლების გათვლისა, სწრაფი მოქმედებები, უნარების სწორი და დროული გამოყენება, კონკრეტული იარაღებისა თუ დამცავი ნივთების ყიდვა და სხვა უამრავი ფაქტორის გათვლა სჭირდება.

როგორც ხელოვნური ინტელექტის შემქმნელები ამბობენ, დოტას წესები იმდენად რთული და იმდენად ბევრია, რომ შეუძლებელია მისი ისე აღწერა, რომ ამ წესების გაცნობის შემდეგ, გამოცდილების გარეშე, ვინმე პროფესიონალი მოთამაშის დონემდე მივიდეს. შესაბამისად, Open AI-ს მიერ შექმნილმა ბოტმა თამაში მთლიანად თავისით ისწავლა, თამაშისა და სამყაროს ნულოვანი ცოდნით. ის თავისი თავის ასლ ბოტს ეთამაშებოდა, რაც იმას ნიშნავდა, რომ მას მუდმივად თანაბარი სიძლიერის მოწინააღმდეგე ჰყავდა. თამაშის პროცესში, AI-მ დასწავლის მეთოდით (Machine Learning), იმდენად კარგად ისწავლა Dota 2-ის თამაში, რომ სატესტო მატჩში მან მსოფლიოს საუკეთესო მოთამაშე დაამარცხა.

როგორც Open AI-ს წარმომადგენელი ამბობს, ბოტის წინააღმდეგ სავარჯიშოდ თამაში ბევრმა პროფესიონალმა გამოთქვა.

პროფესიონალი მოთამაშის, არტურ Arteezy ბაბაევის თქმით, მან ბოტთან თამაშით ბევრი რამ ისწავლა.

Open AI პროექტის შემდეგ ეტაპად 5 ბოტიანი გუნდის შექმნას გეგმავს. ისინი შეეცდებიან ნახონ, შეძლებს თუ არა ბოტების გუნდი გუნდურად თამაშსა და საუკეთესო ადამიანი მოთამაშეების დამარცხებას. გარდა ამისა, დაგეგმილია ბოტებისა და ადამიანების შერეული გუნდის შექმნა, რათა ორივე მხარემ შეძლოს ერთმანეთისგან ახალი რაღაცების სწავლა და უფრო მაღალ დონეზე თამაში.

აქ კი შეგიძლიათ, ნახოთ Dendi-სა (მსოფლიოს ერთ-ერთი საუკეთესო მოთამაშე) და Open AI-ს შერკინება: