"გვახალისებს ეს მზიანი დარი, შენი მსგავსი ცაში მხოლოდ მზეა", — ალბათ ასე ვუმღერებდით დღეს საქართველოს პრემიერმინისტრს, ირაკლი კობახიძეს, სამი წლის განმავლობაში ბიუჯეტიდან 344 ათასი ლარი რომ უტენდეროდ მიგვეღო. თუმცა, რადგან ჩვენ ღამის შოუს ბენდი არ ვართ და, სიმართლე ითქვას, სიმღერაზე უკეთ წერა გამოგვდის, გადავწყვიტეთ, ჩვენი პრემიერისთვის დაბადების დღე წერილობით მიგველოცა და ერთიმეორეზე უკეთესი სურვილებიც ჩვენებურ სიად გვექცია.

მაშ ასე, აი, რას ვუსურვებდით ირაკლი კობახიძეს მის 46-ე დაბადების დღეზე:

1. მიწვევების აქეთ გაუქმებას

ფოტო: ტელეკომპანია იმედი

ცნობისთვის, მისივე დაბადების დღეზე, 25 სექტემბერს, აშშ-ის პრეზიდენტის მიერ მსოფლიო ლიდერების ტრადიციულ მიღებაზე კობახიძეს მიწვევა გაუუქმეს. ალბათ არ დასცალდა, თორემ შეიძლება სულაც თავადვე აპირებდა იმავეს გაკეთებას. ასე რომ, სადაბადებისდღეო სურვილებიც რეპუტაციის აღდგენით დავიწყოთ.

2. IQ-იან, ინტელექტუალ, ზრდილობიან და კულტურულ ხალხთან ურთიერთობას

IQ, ინტელექტი, ზრდილობა და კულტურა — ანუ Father, Son, and House of Gucci ქართულად. საკუთარ გუნდში ასეთი ადამიანების პოვნა კი ალბათ გაუჭირდება...

3. გოიმობის დამარცხებასაც

ფოტო: რადიო თავისუფლება

ვეჭვობთ, ვერც ეს კრიტერიუმი ვერ დაეხმარება თანაპარტიელებთან დაახლოებაში... მაგრამ, სხვა თუ არაფერი, შეუძლია ჩვენი ქვიზი გამოიყენოს გოიმდეტექტორად.

4. საპატიო სტუმრის სკამს დიქტატორების სატირალში

ფოტო: პირველი არხი

მერე რა, თუ ამასობაში მისი სკამი შეიძლება ოკუპანტი ქვეყნის დეპუტატმა დაიკავოს...

5. ოპონენტების დემოკრატიულად დამთავრებას

ფოტო: პირველი არხი

მანამდე ალბათ ქვეყანაში სიდუხჭირის დამთავრება აჯობებდა, მაგრამ რას იზამ, კაცია და გუნებაო.

ისე, შეგახსენებთ, რომ მმართველი პარტია არჩევნებში გამარჯვების შემთხვევაში მართლაც აპირებს ოპოზიციური პარტიების არაკონსტიტუციურად გამოცხადებას. ირაკლი კობახიძის თქმით კი, ეს, არც მეტი, არც ნაკლები, დემოკრატიული პროცესია!

6. ტერანუოვაში მოგზაურობას

ფოტო: მთავარი არხი

იქნებ, პრემიერადაც დაიტოვონ იქ...

ტერანუოვა რა არის? შენ რა, ნუთუ ჯერ კიდევ არ წაგიკითხავს ჩვენი პრემიერის ზღაპარი დაბრუნება ტერანუოვაში? ანოტაციაში ვკითხულობთ, ეს არის წიგნი მათთვის, ვისაც სურს წაშალოს ზღვარი ოცნებასა და რეალობას შორისო... აი, მესმის ირონია.

7. კბილებიან აფთრებთან შეხვედრას

ფოტო: პირველი არ

თუმცა, ფასებთან ერთად, სტომატოლოგიური მომსახურებაც ისეთი გაძვირებულია ქვეყანაში, საეჭვოა, აფთრებმა კბილების ჩასმა შეძლონ.

8. დაბოლოს: "ბევრის გაგრძელებას" — თავისი რეგალიების სრულად ჩამოთვლას

იცი, ვინ არის თბილისის სახელმწიფო უნივერსიტეტის და დიუსელდორფის უნივერსიტეტის სამართლის მაგისტრი, დიუსელდორფის უნივერსიტეტის სამართლის დოქტორი, თბილისის სახელმწიფო უნივერსიტეტის პროფესორი, ევროპის საბჭოს საპარლამენტო ასამბლეის ვიცეპრეზიდენტი? ჩვენც აქ შევჩერდებით.