უახლოეს კვირებში თუ უნგრეთის დედაქალაქში მიემგზავრებით, საღამოთი ისეთი ბუდაპეშტი არ დაგხვდებათ, როგორსაც ალბათ მოელით. მსოფლიოში საკანონმდებლო ორგანოს ერთ-ერთი უდიდესი შენობა, უნგრეთის პარლამენტი, ბუდას ციხესიმაგრე, ციტადელი და ბუდაპეშტის სხვა ცნობილი ღირსშესანიშნაობები ჩაბნელდა — ელექტროენერგიის დეფიციტის გამო, ქალაქის მერიამ სახელმწიფო ნაგებობებზე დეკორატიული განათებების განუსაზღვრელი დროით გამორთვა გადაწყვიტა. ბუდაპეშტის მერმა კერძო შენობების მეპატრონეებსაც მიმართა თხოვნით, მათ მაგალითს მიჰყვნენ.

"ქალაქის ხედი დროებით უფრო მოკრძალებული გახდება, მაგრამ, სანაცვლოდ, მეტი ენერგია დაიზოგება აუცილებელი საჭიროებებისთვის", — აცხადებს მერი გერგეი კორაჩონი და ამატებს, რომ ბუდაპეშტში ასევე გამოირთობა შადრევნები.

@seeusbudapest From today, the decorative lightings of Budapest are turned off to save electricity. It is because of the extreme heat and the all time low water level of the Danube. #budapest #seeusbudapest #budapestguide #budapestnight #budapesttravel ♬ original sound - songs n lyrics

უნგრეთში ელექტროენერგიის მწვავე დეფიციტი ცენტრალურ ევროპაში რეკორდულმა სიცხეებმა და გვალვამ გამოიწვია, რომლის შედეგადაც მდინარე დუნაის დონემ ისტორიულ მინიმუმამდე დაიწია. სწორედ დუნაის წყალს იყენებს გასაგრილებლად ბუდაპეშტში პაკსის ატომური ელექტროსადგური, რომელიც ქვეყნის ელექტროენერგიის 40 პროცენტს აწარმოებს. გვალვის გამო კი, სადგური 44 წლის განმავლობაში პირველად, სრულად დაიხურა.

უნგრეთის პრემიერმინისტრი პეტერ მადიარი ამბობს, რომ მაღალი ტემპერატურის გამო, ელექტროენერგიის დეფიციტმა, შესაძლოა, "საგანგებო მდგომარეობაც გამოიწვიოს", სიტუაციის უფრო გამწვავების თავიდან ასაცილებლად კი "კოორდინირებული ნაბიჯების გადადგმა და თვითშეზღუდვაა" საჭირო. ხელისუფლება მოქალაქეებსა და მეწარმეებს ასევე მოუწოდებს, მაქსიმალურად შეამცირონ ელექტროენერგიის მოხმარება პიკის საათებში, საღამოს ხუთიდან ათ საათამდე.