წლევანდელი ვენეციის კინოფესტივალი პოპკულტურისა და კინემატოგრაფიული სამყაროსათვის ძალიან მნიშვნელოვანი და საინტერესო აღმოჩნდა. წელს ახალი სახეები და ძველი ვარსკვლავები, დიდებული ეკრანზე დაბრუნებები და დებიუტები ვიხილეთ. მოდით, ერთად შევაჯამოთ კინოს იტალიური დღესასწაული:

პირველ რიგში, ის უნდა აღინიშნოს, რომ ვენეციის კინოფესტივალზე ჩვენმა ქვეყანამ გამორჩეულ წარმატებას მიაღწია — დეა კულუმბეგაშვილის ფილმმა აპრილი ჟიურის სპეციალიური ჯილდო დაიმსახურა. ფილმში მთავარ როლებს მერაბ ნინიძე, ია სუხიტაშვილი და კახა კინწურაშვილი ასრულებენ. ფილმში მეანი ქალის ისტორიაა მოთხრობილი, რომელიც თანასოფლელებს ფეხმძიმობის ნაადრევ შეწყვეტაში ეხმარება.

ვენეციის კინოფესტივალის მთავარი პრიზის, ოქროს ლომის მფლობელი ცნობილი ესპანელი რეჟისორი, პედრო ალმოდოვარი გახდა ფილმისთვის მეზობელი ოთახი. ამ "ევთანაზიურ დრამაში" მთავარი როლებს ტილდა სუინტონი და ჯულიან მური ასრულებენ. სიუჟეტი ინგრიდსა და მართაზე გვიამბობს, ქალებზე, რომლებიც ახალგაზრდობაში ახლო მეგობრები იყვნენ და ერთად მუშაობდნენ ჟურნალში. წლების გასვლისა და ერთმანეთთან გაუცხოების შემდეგ ისინი ექსტერმალურ პირობებში კვლავ გადაიკვეთებიან. აღსანიშნავია, რომ მეზობელი ოთახი ალმოდოვარის პირველი ინგლისურენოვანი ფილმია.

ვენეციის კინოფესტივალის პრიზიორები გახდნენ, ასევე, მორა დელპეროს Vermiglio, ბრეიდი კორბეტის The Brutalist, ჰალინა რეინის Babygirl, ლუკა გუადანინოს Queer და პაბლო ლარენის Maria, რომელიც მარია კალასის ცხოვრების შესახებაა გადაღებული და
და ანჯელინა ჯოლიმ, რომელიც მთავარ როლს ასრულებს, 8 წუთიანი უწყვეტი ოვაციები დაიმსახურა.

ვენეციის კინოფესტივალზე საუკეთესო ქალი მსახიობის პრიზი ნიკოლ კიდმანმა მოიპოვა ფილმისთვის Babygirl, რომელიც ეროტიკული დრამაა. ფილმი ძლიერ აღმასრულებელ დირექტორზეა, რომელიც ახალგაზრდა სტაჟიორთან რომანის გამბით საფრთხეს უქმნის თავის კარიერასა და ოჯახურ ცხოვრებას. კიდმანს ფესტივალის მიმდინარეობისას დედა გარდაეცვალა, რის გამოც ვენეციის დატოვება მოუწია. მისი კუთვნილი ჯილდო ფილმის რეჟისორმა, ჰალინა რეინმა აიღო.

განსაკუთრებით აღსანიშნავია ტიმ ბარტონის ფილმი Beetlejuice, Beetlejuice, რომლის პრემიერაც რეჟისორის ვარსკვლავის გახსნამდე რამდენიმე დღით ადრე შედგა ვენეციაში. ფილმი ბარტონის 1988 წლის ფილმის, Beetlejuice-ის სიქველია და მიუხედავად იმისა, რომ კრიტიკოსები ფილმზე არც ისე სახარბიელო პროგნოზებს აკეთებდნენ, ფილმმა შესაშური შეფასებები და მაყურებლის სიყვარული დაიმსახურა. მეტიც, Beetlejuice, Beetlejuice უკვე დიდ ეკრანებზე გამოვიდა და მისი დონე ფილმის შემოსავალზეც აისახა.

ტიმ ბარტონის გასამხნევებლად მისი შეყვარებული, იტალიელი მსახიობი მონიკა ბელუჩიც იყო მისული, რომლის სილამაზემ წითელი ხალიჩის ფოტოგრაფების ყურადღება მრავალი სხვადასხვა რაკურსიდან დაიმსახურა.

ვენეციის კინოფესტივალზე მობილიზებული პაპარაცების განსაკუთრებული ყურადღება ჰოლივუდის "საუკეთესო მეგობრების" დუეტმა, ჯორჯ კლუნიმ და ბრედ პიტმა დაიმსახურეს, რომელთა საერთო ფილმის, ჯონ უოტსის Wolfs-ის პრემიერაც ვენეციის კინოფესტივალის ფარგლებში შედგა. ეს მათი მეშვიდე საერთო ფილმია.

მთელი მსოფლიო განსაკუთრებული ყურადღებით ელოდა ხოაკინ ფენიქსისა და ლედი გაგას ფილმს Joker: Folie à Deux, რომელმაც ჯოკერის პერსონაჟზე გადაღებული ფილმების კლასიკური სტილიდან გადაუხვია და ეს საკულტო ფიგურა მიუზიკლით წარმოაჩინა. როგორც ირკვევა, ფილმმა განსაკუთრებული აღფრთოვანება ვერ დაიმსახურა, თუმცა ხოაკინ ფენიქსს ამ როლის შესასრულებლად მნიშვნელოვანი ფიზიკური ტრანსფორმაცია და ხელოვნების გამო კომპრომისებზე წასვლა დასჭირდა, რამაც კიდევ ერთხელ დაამტკიცა, რამდენად თავდადებული და გენიალური მსახიობია.

ლედი გაგას პირად ცხოვრებაში დიდი სიახლეებია, რაზეც უამრავი ტაბლოიდი იწერება — ცნობილია, რომ ის ამერიკელ ტექნოლოგიურ ინვესტორზე, მაიკლ პოლანსკიზე დაინიშნა. ვენეციის კინოფესტივალზე გაგა საქმროსთან ერთად მოვიდა და თავისი ნიშნობის ბეჭედიც გამოაჩინა, რომელიც, როგორც ექსპერტები იუწყებიან, $578 000 ღირს.